O alcalde de Ferrol, José Manuel Rey Varela, presentou esta mañá na praza de Armas os novos vehículos do servizo de limpeza que “reforzarán de maneira decisiva os traballos de desbroce na cidade, tanto na zona rural como na urbana”, manifestou.
Trátase dun total de 13 vehículos: dúas desbrozadoras hidrostáticas, tres tractores con brazo desbrozador, tres barredoras de calzadas, dous vehícuos 4×4 e tres remolques equipados con sistemas de limpeza a presión.
O alcalde, acompañado do concelleiro de Servizos, José Tomé, comprobaron in situ o funcionamento da nova maquinaria que permitirá ter unha cidade máis limpa”, manifestou. “Levábamos máis de 10 anos nunha situación absolutamente precaria. O ano pasado demos ese salto importantísimo de contar cun novo servizo de limpeza e este ano imos ver un salto de calidade na cidade”, engadiu.
Un dos aspectos máis relevantes do contrato é a inclusión, por primeira vez, do servizo de desbroces ao que servirán estes novos vehículos. Con el, “garántese un servizo fundamental, especialmente demandado pola veciñanza do rural pero tamén necesario noutros puntos da cidade”, apuntou Rey Varela.
Este é un dos asuntos do día a día que son “importantísimos nas cidades, e buscamos mellorar o coidado das nosas rúas e das nosas prazas, como xa fixemos cos xardíns”, lembrou Rey Varela.
Así mesmo, o alcalde destacou que estes novos vehículos mellorarán as condicións de traballo dos operarios do servizo xa que “non é o mesmo empregar estas máquinas que facer os traballos manualmente”, puntualizou. Neste sentido, explicou que “ata o de agora o Concello non contaba con remolques con sistema de limpeza a presión e só había unha barredora. Antes, o contrato de desbroces eran dous camións e agora pasamos a cinco. Estamos dando un salto de calidade que é o que merece Ferrol e os ferroláns”.
Pola súa banda, José Tomé lembrou que o Concello fixo un investimento de 12 millóns de euros en vehículos para este servizo e avanzou que chegará nova maquinaria ao longo do ano.
