O alcalde de Ferrol, José Manuel Rey Varela, anunciou hoxe o inicio do expediente de contratación de dúas obras no ámbito da mellora das instalacións deportivas: o pavillón polideportivo do Ensanche A e a Casa do Deporte. “Nos próximos días sairán a licitación as obras de reparación e mellora do pavillón polideportivo do Ensanche A e da Casa do Deporte, dúas importantes actuacións que suman 550.000 euros”, avanzou.
O Goberno local amosa, unha vez máis, o seu compromiso co deporte e cos deportistas ferroláns. “Avanzamos no proxecto da Cidade do Deporte que contempla unha inversión global de 18 millóns euros”, afirmou.
PAVILLÓN ENSANCHE A
Rey Varela recordou as actuacións que se van levar a cabo, nun prazo de catro meses, no pavillón polideportivo do Ensanche A. Así, están previstos, entre outros traballos, a reparación da cuberta, que se atopa en mal estado debido á falta de mantemento durante anos. Realizarase unha limpeza exhaustiva para eliminar maleza e residuos da superficie, posteriormente recibirá un tratamento e a colocación dunha malla de fibra de vidro. Tras este proceso levarase a cabo a fase de impermeabilización.
En canto á pista, procederase ao levantado do pavimento de madeira existente en todas as zonas que se atope afectado pola polilla. Realizarase un pulido xeral para a regularización da superficie e aplicarase un tratamento antipolilla e unha man de imprimación. Así mesmo, substituirase a instalación de fontanería para unificar materiais e solucionar os problemas de óxido existentes.
O pavillón contará con nova iluminación da pista, para cumprir a norma UNE-EN 12193 Iluminación de instalacións deportivas de Clase II Competicións rexionais/locais.
Outra das actuacións é a ampliación da porta de acceso directo á pista desde o exterior e a mellora da accesibilidade da planta baixa para os usuarios en cadeira de rodas. Desta maneira, instalarase unha porta corredera automática en substitución da existente entre o volume de vestiarios e a rampla de acceso á planta primeira.
En canto aos vestiarios e aseos, substituiranse os azulexos e as planchas do falso teito que estean en mal estado. As obras contan cun investimento de 360.555,51 euros.
CASA DO DEPORTE
Na Casa do Deporte as obras proxectadas teñen por obxecto a reparación e mellora desta instalación, actuando, principalmente, sobre a cuberta, a protección fronte a humidades, a instalación de iluminación, a ventilación da pista e as condicións de accesibilidade.
Así, contémplase a renovación integral da cuberta lixeira actual. Procederase á retirada da chapa existente e dos lucernarios, cuxa presenza contribúe aos problemas de condensación e goteo sobre a pista. Prevese a colocación dunha nova cuberta adecuada ao uso deportivo, que mellorará o comportamento térmico e reducirá a aparición de condensacións.
Ademais, renovaranse os canlóns perimetrais e baixantes, mellorando a recollida e evacuación de augas pluviais e as luminarias da pista, mediante a instalación de novas luminarias LED de altas prestacións
Con respecto ao sistema de ventilación, implantaranse equipos de impulsións/extraccións que favorezan a renovación do aire interior e o control da humidade relativa.
Para mellorar a accesibilidade e adecuar o itinerario á normativa vixente, construirase unha rampla accesible de conexión coa pista.
Este proxecto conta cunha inversión de 188.329,82 euros e deberán executarse en tres meses.
Ademais, o alcalde informou que na XGL tamén se aprobou o Plan de Seguridade e Saúde e aceptación do Plan de Xestión de Residuos das obras do renovación de dous campos de fútbol 7 de céspede artificial na Gándara, actuación que conta cunha inversión de máis de 306.000 euros. “Esperamos que as obras poidan comezar esta semana e se sumen así á remodelación das dúas pistas de fútbol 8 do parque deportivo de Caranza, nas que estamos a invertir 809.000 euros”, avanzou Rey Varela.
A Cidade do Deporte é un proxecto cofinanciado polo Concello de Ferrol, a Xunta de Galicia, a través da Consellería de Deportes, e a Unión Europea.
