ASPABER celebrará este venres 22 de maio ás 11:30 horas o acto oficial
de inauguración da ampliación do seu Centro de Día, nunha xornada institucional que terá
lugar na propia sede da entidade, en LGR da Brea.
Esta inauguración encádrase dentro da programación especial do 50 aniversario de ASPABER,
unha celebración coa que a entidade está a conmemorar cinco décadas de traxectoria,
compromiso e traballo en favor das persoas con diversidade funcional e das súas familias.
O acto contará coa presenza de diferentes autoridades autonómicas, provinciais e locais, entre
elas a conselleira de Política Social, Fabiola García; o presidente da Deputación da Coruña,
Valentín González Formoso; o alcalde de Carballo, Daniel Pérez; o director xeral de Maiores e
Atención Sociosanitaria, Antón Acevedo; así como outros representantes institucionais.
A xornada comezará coa recepción das autoridades e invitados, seguida da benvida
institucional por parte da Presidencia e Dirección de ASPABER.
Posteriormente, realizarase unha visita polas instalacións actuais do Centro de Día e do Centro
Ocupacional, durante a que se presentarán os diferentes espazos e servizos da entidade,
permitindo tamén un encontro directo coas persoas usuarias e profesionais no
desenvolvemento das actividades habituais do día a día.
A continuación, terá lugar a visita á nova ampliación do Centro de Día, onde se ofrecerá unha
explicación técnica e funcional das novas instalacións, así como da ampliación da capacidade
do servizo, que permitirá atender ata 35 persoas.
O programa incluirá tamén un encontro institucional entre ASPABER e as autoridades
asistentes, no que se abordarán diferentes cuestións relacionadas coa actividade da entidade,
as necesidades actuais e os proxectos de futuro.
O acto concluirá cun agradecemento institucional ás autoridades e asistentes, unha fotografía
oficial e a despedida da xornada.
Con esta ampliación, ASPABER continúa reforzando o seu compromiso coa atención, o coidado
e a mellora da calidade de vida das persoas con diversidade funcional e das súas familias.
