O concelleiro de Deportes de Ferrol, Ricardo Aldrey, presentou esta mañá o Campionato de Bodyboard Cidade de Ferrol, que acada xa a súa novena edición.
A proba terá lugar os vindeiros 28, 29 e 30 de agosto na praia de Penencia-Doniños e contará con 300 deportistas inscritos nas diferentes ligas e categorías. Así, tal e como detallou Aldrey, disputarase no marco do campionato a Liga Nacional 100% Bodyboard, que será a proba de maior puntación; a Liga Galega de Bodyboard e o Campionato Local de Bodyboard Ferrolterra. En canto ás categorías, serán feminino, sub-14, júnior, open, máster e drop-knee.
Paralelamente, ofrecerase ao público actividades alternativas como “cultura BB Ferrol: música en vivo e fotografía” e “concienciación medioambiental: protección do litoral”.
Tal e como subliñou o presidente do clube Bodyboard Ferrol, José Harto, a cita deportiva é tamén “unha fin de semana que fomenta o deporte, o turismo e o respecto polo medio ambiente en Ferrolterra”.
No acto de presentación tamén participou a delegada da Xunta de Galicia en Ferrol, Martina Aneiros, e Bruno Martín, en representación dos deportistas.
