A VIII Feira do Queixo de Moeche celebrarase o vindeiro domingo 15 de marzo na Nave do Mercado, consolidándose como unha das citas gastronómicas de referencia da comarca. O evento nace co obxectivo de fomentar o consumo responsable e a cultura do queixo, ao tempo que pon en valor o labor de pequenas e grandes queixarías como motor de desenvolvemento sustentable no rural.
Durante a xornada, o recinto feiral acollerá unha ampla mostra de queixos artesáns, con presenza de DOP galegas, marcas do resto do Estado e produtos internacionais que participan desde as primeiras edicións, procedentes de países como Francia, Italia ou Suíza.
Entre as novidades deste 2026 destaca a instalación do Mercado de Artesanía Agroalimentaria da Deputación da Coruña, que se situará nunha gran carpa ao pé da nave. A programación incluirá postos de distintos sectores da alimentación artesá, showcookings e concertos enmarcados na Rede Cultural 2026, dentro da campaña provincial A paisaxe que sabe. A feira contará ademais cunha variada programación cultural e gastronómica, con actuacións musicais, catas dirixidas, obradoiros e venda de produto agroalimentario fresco e elaborado.
A VIII Feira do Queixo reafirma así o seu compromiso coa promoción do produto local, a dinamización económica e a posta en valor do patrimonio gastronómico e cultural de Moeche.
Toda a información sobre a convocatoria aqui.
