Hai éxitos que se miden en medallas, e outros que se miden polo enorme valor do camiño percorrido para conseguilas. O Club de Remo Cedeira volveu demostrar esta fin de semana que a ilusión, o traballo e a constancia poden competir de igual a igual cos grandes referentes do remo nacional. No Campionato de España de Remo Olímpico nas categorías alevín, infantil e veterano, celebrado no CEAR da Cartuja, en Sevilla, a entidade cedeiresa asinou unha actuación extraordinaria que a situou no terceiro posto do medalleiro nacional, un resultado que confirma a extraordinaria proxección dun dos clubs máis modestos, pero tamén máis admirados, do remo español.
O mérito cobra unha dimensión aínda maior se se ten en conta que no campionato participaron 63 clubs de toda España e que a expedición cedeiresa estivo formada unicamente por sete deportistas, distribuídos en tres embarcacións de skiff e dúas de dobre scull. Un grupo reducido, pero cun enorme talento e unha admirable capacidade competitiva, que soubo converter cada regata nun exemplo de esforzo, superación e compromiso.
Ademais de acadar o terceiro posto no medalleiro nacional, o Club de Remo Cedeira foi tamén o club galego máis laureado do campionato, ao sumar catro medallas: dúas de ouro e dúas de prata. Os títulos nacionais chegaron no skiff alevín feminino e no skiff infantil feminino, mentres que as dúas medallas de prata foron conquistadas con outro skiff alevín feminino e co dobre scull alevín masculino, superando con claridade o balance do resto de clubs galegos presentes na cita sevillana.
Estes resultados non son froito da casualidade. Son a consecuencia dun traballo constante que o Club de Remo Cedeira leva desenvolvendo desde hai máis de catro décadas, formando deportistas e transmitindo valores como o esforzo, a humildade, a disciplina e o compañeirismo. Un proxecto deportivo que medrou desde a base, sempre coa vista posta na canteira e no desenvolvemento persoal dos seus rapaces e rapazas.
Un papel esencial nesta evolución corresponde ao seu adestrador, Chema Hermida, un namorado do remo desde ben noviño que leva anos entregando o seu tempo, os seus coñecementos e a súa ilusión de xeito totalmente voluntario. A súa adicación e a súa paixón son unha das grandes fortalezas deste club, capaz de competir cos mellores sen contar cos medios dos grandes.
Hai unha frase que Chema lles repite con frecuencia aos seus rapaces e rapazas, sempre entre risas cómplices: «Eu non gañei a miña primeira medalla ata que fun veterano.» Un xeito sinxelo, pero cheo de significado, de lembrarlles que cada deportista ten o seu ritmo, que non hai que ter présa, que o importante é seguir traballando e gozando do camiño.
Á vista dos resultados que hoxe recolle o Club de Remo Cedeira, ben podería dicirse que a vida non puxo a Chema no remo para encher a súa propia vitrina de medallas, senón para axudar a que sexan outros/as quen as conquisten. Porque hai persoas que fan historia gañando competicións, e outras que a fan formando campións e campioas. E, probablemente, ese sexa o maior triunfo dun adestrador que fixo do compromiso e da xenerosidade a súa forma de entender o deporte.
A excelente actuación en Sevilla non fai máis que confirmar a extraordinaria proxección deportiva do Club de Remo Cedeira, especialmente no remo feminino, pois o club pode presumir de contar na actualidade con dúas remeiras internacionais: Candela Martínez e Raquel Rodríguez, que continúan a súa formación deportiva e académica nos Estados Unidos, onde compiten no esixente circuíto universitario. O seu percorrido converteuse nun exemplo para as novas xeracións e demostra que, desde un pequeno club dunha vila mariñeira como Cedeira, é posible abrirse camiño ata a élite internacional.
O éxito acadado en Sevilla confirma que o Club de Remo Cedeira vive un dos momentos máis brillantes da súa historia. Cunha estrutura modesta, pero cun inmenso capital humano, segue demostrando que a ilusión, o traballo diario e a confianza na canteira poden derrubar calquera límite.
Este 3° posto no medalleiro Iberdrola e no xeral, o 5° no Promoción e o liderado entre os clubes galegos non son só un premio ao esforzo destes sete mozos e mozas. Son tamén o recoñecemento a un proxecto deportivo exemplar, construído con humildade, sacrificio e amor polo remo, que leva o nome de Cedeira aos postos máis destacados do panorama nacional.
Porque, ao final, as medallas son metal, pero o verdadeiro legado dun club mídese nas persoas que forma, nos valores que transmite e na pegada que deixa en cada xeración. E nese medalleiro, o Club de Remo Cedeira leva moitos anos ocupando o primeiro posto.
