O alcalde de Ferrol, José Manuel Rey Varela, anunciou hoxe un dos primeiros concertos do programa das Festas de Verán 2026 de Ferrol. “Hoxe, 20 de abril, non había mellor data para facer este anuncio: Celtas Cortos, coñecidos polo éxito da canción co mesmo nome, actuarán na nosa cidade”, avanzou.
O grupo vallisoletano actuará o 26 de agosto na praza de Armas, coa xira 40 años Contando Cuentos a Ferrol. A banda, que naceu en 1986, lanzou en 1991 Cuéntame un cuento, que incluía unha das cancións máis populares do grupo, 20 de abril. Con este traballo realizaron máis de 260 concertos entre 1991 e 1992, incluíndo shows multitudinarios na Expo de Sevilla, as Ventas de Madrid ou nas festas da Mercé, onde reuniron máis de 63.000 persoas.
Durante a súa traxectoria musical lanzaron 13 discos de estudo, seis recompilatorios e tres álbums en directo, e entre outras colaboracións destaca a versión de Cuéntame un cuento que gravaron xunto ao artista americano Willy Deville. Nestes 40 anos compartiron tamén escenario con artistas como Peter Gabriel, Miguel Ríos, Silvio Rodríguez, Fito ou Rozalén, entre moitos outros.
O orzamento deste concerto é de 38.000 euros.
