A X edición do Foro Territorios Patrimonio celebrarase o vindeiro 23 de xullo en Bodegas Regina Viarum, na Ribeira Sacra, baixo o título Patrimonio, territorio e futuro: unha conversa necesaria. O encontro, organizado por i-radia Crea como xornada previa a Dezaseteº Ribeira Sacra, cumpre dez edicións consolidado como un espazo de reflexión arredor dos territorios rurais, o seu patrimonio, os seus retos de futuro e as novas formas de comunicar, preservar e activar estes espazos desde unha mirada responsable e contemporánea. As inscripcións para asistir, de balde, xa se poden realizar en foroterritoriospatrimonio.com
Ao longo da xornada, o Foro reunirá administracións, profesionais, empresas, e proxectos de referencia para abordar cuestións clave como o futuro dos patrimonios rurais, a comunicación responsable dos territorios, o equilibrio entre conservación e desenvolvemento ou o papel que desempeñan as iniciativas locais na construción de modelos sostibles. O X Foro Territorios Patrimonio está organizado por i-radia Crea e conta co patrocinio da Axencia Galega de Desenvolvemento Rural da Xunta de Galicia e Naturgy, ademais da colaboración de Labauh e Bodegas Regina Viarum.
A edición deste ano propón unha nova mirada sobre os territorios rurais como espazos vivos, capaces de conservar o seu patrimonio ao tempo que afrontan os desafíos do presente e do futuro. Neste sentido, o Foro poñerá o foco en experiencias que forman parte da realidade da Ribeira Sacra, desde a convivencia entre a paisaxe cultural e as infraestruturas hidráulicas ata proxectos que demostran como o territorio pode xerar innovación, actividade económica e novas oportunidades sen perder a súa identidade.
Nun momento especialmente significativo para a Ribeira Sacra, inmersa na recta final da súa candidatura a Patrimonio Mundial da UNESCO, o Foro quere tamén poñer en valor o camiño percorrido durante estes anos e reivindicar a importancia de seguir preservando o patrimonio e o territorio rural como un compromiso colectivo e de longo percorrido.
Como en edicións anteriores, o encontro estenderá o debate ao propio territorio, incorporando unha visita ao encoro de Belesar e a unha adega da Ribeira Sacra, dous espazos que exemplifican o equilibrio entre patrimonio, paisaxe, aproveitamento dos recursos e actividade vitivinícola.
Un espazo de diálogo internacional desde a Ribeira Sacra
O Foro Territorios Patrimonio naceu coa vocación de situar a Ribeira Sacra no centro do debate sobre o futuro do turismo cultural e a riqueza patrimonial como dinamizadora do territorio. Ao longo das súas dez edicións, consolidouse como un foro internacional dirixido a profesionais da cultura, o turismo, a comunicación, a xestión patrimonial, estudantes e público xeral interesado en afondar nos retos e oportunidades dos territorios rurais.
As inscricións para asistir ao X Foro Territorios Patrimonio son gratuítas e xa poden realizarse a través da páxina web www.foroterritoriospatrimonio.com.
O X Foro Territorios Patrimonio está organizado por i-radia Crea e conta co patrocinio da Axencia Galega de Desenvolvemento Rural da Xunta de Galicia e Naturgy, ademais da colaboración de Labauh e Bodegas Regina Viarum.
