Carballo celebrará o domingo 12 de abril a segunda edición do Feirón en rede “Carballo solidario”, unha iniciativa que busca poñer en valor o traballo das entidades sociais do municipio e achegalo á cidadanía nun espazo aberto, participativo e dinámico.
O escenario da actividade será a Praza do Concello, na que se darán cita 14 entidades sociais que desenvolven a súa actividade no noso concello: AECC, ALCER, Fundación Érguete Integración, Cruz Vermella, Un Paso Máis, O Legado de Max, Afaber, Cáritas, Aspaber, APEM, Íntegro, Vieiro, Lenda Educativa e Senegaleses Carballo.
Esta semana celebrouse unha nova xuntanza de coordinación, na que se ultimaron os detalles tanto da exposición como do propio evento, e que contou coa participación do alcalde, Daniel Pérez; a concelleira de Servizos Sociais e Igualdade, Maica Ures; o concelleiro de Feiras e Mercados, Ramón Varela, e a concelleira de Cultura e Festas, Maruxa Suárez.
O alcalde subliñou a importancia do traballo conxunto: “Carballo é un concello cun tecido asociativo moi activo e comprometido, e desde a administración local temos a responsabilidade de apoiar, visibilizar e colaborar con todas estas entidades que contribúen a construír unha sociedade máis xusta e solidaria”.
Unha xornada chea de actividade
Durante a xornada, que arrincará ás 10.30 horas, cada entidade disporá dun posto no que poderá dar a coñecer o seu traballo, ofrecer información e desenvolver actividades de sensibilización dirixidas ao público asistente, entre elas un obradoiro de reutilización de redes da pesca, unha exhibición de música do Senegal ou un partido de fútbol 5 (fútbol para invidentes).
Unha das principais novidades desta edición será a exposición Que pasaría se non existisen as entidades sociais?, que se instalará ao aire libre na propia Praza do Concello. Trátase dunha iniciativa pensada para reflexionar sobre o papel esencial que desempeña o tecido asociativo na sociedade e para facer visible o impacto real do seu traballo no día a día da veciñanza.
O programa completarase cun servizo de canguraxe e animación infantil, co obxectivo de facilitar a conciliación das familias, así como cunha actuación musical a cargo da Charanga Benofán, que contribuirá a dinamizar o ambiente durante a mañá.
Dúas concellarías implicadas
“Este feirón é unha oportunidade para recoñecer e visibilizar o traballo imprescindible que desenvolven as entidades sociais do noso concello, moitas veces de maneira silenciosa pero cun impacto fundamental na vida das persoas”, apuntou Maica Ures, concelleira de Servizos Sociais e Igualdade.
Pola súa banda, o concelleiro de Feiras e Mercados puxo en valor o formato da iniciativa: “Os feiróns en rede permítennos aproveitar un espazo xa consolidado como a feira para dar visibilidade a outros sectores, ao tempo que supoñen un valor engadido para a propia feira, neste caso poñendo o foco no ámbito social, clave para o benestar da veciñanza”, manifestou Ramón Varela.
Con esta iniciativa, o Concello de Carballo continúa apostando polos Feiróns en rede como espazos de encontro, colaboración e visibilización dos sectores e colectivos que desempeñan un papel fundamental no desenvolvemento social do municipio.
