A Coruña acollerá este mércores, 13 de maio, o III Encontro de Alcaldesas, unha cita que converterá a cidade nun espazo de reflexión e diálogo arredor do papel da cultura como axente clave de dinamización social, económica e urbana. O encontro reunirá alcaldesas de Galicia e doutras cidades do Estado, ademais de representantes do ámbito cultural, académico e xornalístico.
A alcaldesa da Coruña, Inés Rey, destacou a importancia deste encontro como «un espazo necesario para tecer redes entre cidades, compartir experiencias e impulsar políticas públicas nas que a cultura, a igualdade e o liderado feminino sexan motores de transformación social e económica». Rey subliñou ademais que «as cidades avanzan máis e mellor cando colaboran e cando as mulleres ocupan espazos de decisión e de referencia».
Trátase dunha cita impulsada pola alcaldesa da Coruña, Inés Rey, durante o anterior mandato municipal e que se celebra cunha periodicidade bienal co obxectivo de fortalecer as redes de colaboración entre mulleres responsables de gobernos locais e abrir espazos de reflexión compartida sobre os retos das cidades. Baixo o lema «Cultura feminista, feminismo na cultura. As alcaldesas falan», o encontro volverá situar A Coruña como referente no impulso de políticas públicas vencelladas á igualdade, á cultura e ao liderado feminino.
A programación arrincará pola mañá no Palacio Municipal de María Pita cunha recepción institucional da alcaldesa, Inés Rey, ás alcaldesas participantes e coa lectura da III Declaración de María Pita, documento que será asinado polas rexedoras presentes.
Sesións de debate: Cultura, memoria e feminismo como eixos do encontro
Xa pola tarde, o encontro trasladarase ao Club Cámara Noroeste, no Parrote, onde se celebrarán diferentes mesas de debate e conversatorios arredor da relación entre cultura, feminismo, memoria e economía. A inauguración oficial terá lugar ás 16.30 horas, tras a chegada das participantes e a apertura conducida pola xornalista Gladys Vázquez, de La Voz de Galicia.
Ás 17.00 horas celebrarase a mesa «Mulleres protagonistas na construción da cultura e da memoria«, moderada pola xornalista da Cadena SER Ainhoa Apestegui. Participarán a poeta e editora Dores Tembrás; a escritora e filósofa Marifé Santiago; e as alcaldesas Susana Herrán Martín, alcaldesa de Castro Urdiales; Mireia González, alcaldesa de Santa Coloma de Gramenet; e Mariví Monteserín, alcaldesa de Avilés.
Xa ás 18.30 horas desenvolverase o conversatorio «Feminismo, cultura e economía«, conducido por Mercedes Wullich, fundadora de MujeresyCia e da lista Top 100 Mujeres Líderes en España. Intervirán as alcaldesas Marián Ferreiro, alcaldesa de Narón, e María José Blanco, alcaldesa de Portugalete; a vicepresidenta de Cultura e Igualdade da Deputación de Cáceres, María Esther Gutiérrez; e a produtora e directora de cine Chelo Loureiro, gañadora de catro premios Goya.
A xornada concluirá ás 19.30 horas cun diálogo final entre alcaldesas e coa lectura das conclusións do encontro, nunha conversa entre Miriam Andrés, alcaldesa de Palencia, e Inés Rey, alcaldesa da Coruña.
