O Parlamento de Galicia aprobou, sen votos en contra, impulsar a candidatura de Lugo para albergar a sede da futura Axencia Estatal de Saúde Pública. Así, a deputada do Grupo Parlamentario Popular, Encarna Amigo, dixo, hoxe, que a cidade “representa unha candidatura extraordinariamente sólida”.
Neste punto, puxo en valor os “méritos máis que suficientes” de Lugo para acoller esta institución e apuntou que conta cun ecosistema sanitario e investigador de referencia, un hospital moderno e consolidado, un Centro Integral de Saúde de última xeración e cun recurso singular e de enorme prestixio como é o Laboratorio de Saúde Pública de Galicia. Así mesmo, salientou que esta candidatura se sustenta en capacidades reais, infraestruturas xa operativas, profesionais altamente cualificados e unha traxectoria consolidada en saúde pública “que poucas outras cidades poden presentar”.
Do mesmo xeito, incidiu en que a nosa Comunidade é hoxe un referente en programas de prevención e detección precoz, vacinación, cribados poboacionais e en políticas de promoción da saúde. “Esta experiencia acumulada constitúe un aval extraordinario para albergar esta institución”, indicou Encarna Amigo.
Tal e como remarcou, esta axencia suporía un motor de emprego cualificado, innovación e desenvolvemento para Lugo e para Galicia, ademais dunha oportunidade para que a nosa Comunidade continúe gañando peso nas políticas públicas de saúde.
Encarna Amigo afeou “a falta absoluta de planificación” do Goberno central e o procedemento “caótico” que está a seguir para a constitución desta axencia. Por iso, fixo fincapé en que a iniciativa do Grupo Popular avoga pola unidade institucional e a suma de esforzos entre administracións –municipal, autonómica e estatal-, co fin de presentar unha proposta que garanta a plena dispoñibilidade das instalacións necesarias, a asunción dos compromisos económicos e técnicos e a dotación das infraestruturas, servizos e persoal.
O GOBERNO CENTRAL INCUMPRE COA DEPENDENCIA
Por outra banda, o Parlamento apoiou por unanimidade a demanda do Grupo Popular de incrementar o número de persoas dependentes atendidas ata acadar, este mesmo ano, a cifra de 100.000 persoas con prestacións ou servizos efectivos –Galicia rematou o primeiro trimestre de 2026 con 93.892 persoas dependentes atendidas e unha ratio de atención do 99,4%-.
Para iso, a deputada Dolores Hermelo reclamou ao Executivo de Pedro Sánchez o financiamento que lle corresponde a Galicia e que, tal e como denunciou, está a reducir ano tras ano: do 40% que achegaba en 2023 –por debaixo do 50% que lle corresponde por lei-, en 2025 baixou ata o 32,9%. “Cada ano, máis obrigas para Galicia e menos compromiso do Goberno central”, apuntou, para continuar recordando que a débeda acumulada coa nosa Comunidade supera xa os 3.000M€.
Tras destacar “o esforzo sen precedentes” da Xunta de Galicia, a parlamentaria popular lamentou “o silencio” dos grupos da oposición ao agravio de Pedro Sánchez con Galicia en materia de dependencia. “Pedímoslle que decida de que lado quere estar: dos prexuízos partidistas ou do lado dos dependentes”, finalizou.
APOIO AOS TRABALLADORES DE NESTLÉ
Por último, o voto favorable do Grupo Popular fixo posible un acordo unánime na Cámara en apoio aos traballadores da planta de Nestlé, en Pontecesures, e ás accións a pór en marcha en relación ao ERE anunciado pola factoría. Así, o Grupo Popular avoga por desenvolver un plan de apoio á industria agroalimentaria galega, orientado á fixación da actividade produtiva no rural e á defensa da cadea de valor.
