O vindeiro luns, día 14 de setembro, dará comezo unha nova edición do Plan de Barrios, unha iniciativa que o Goberno local recuperou para reforzar os servizos ordinarios tanto na zona urbana como no rural. As actuacións desenvolveranse semanalmente desde este mes e prolongaranse ata a primavera de 2027.
O concelleiro de Servizos e Zona Rural, José Tomé, sinalou que o obxectivo do programa é “realizar un reforzo dos servizos ordinarios na cidade, como a iluminación, a limpeza viaria, os xardíns e os viais, así como escoitar novas demandas veciñais”.
Nesta edición, o Plan de Barrios chegará a 17 parroquias do rural e 13 barrios urbanos. O calendario comezará o 14 de setembro en Prioriño e continuará o día 21 en A Graña e o día 28 en Valón.
Durante o mes de outubro, as actuacións trasladaranse a Recimil (día 5), O Lago (día 12), San Xoán (día 19) e Santa Icía (día 26). En novembro será a quenda de Ferrol Vello (día 2), Pazos (día 9), Esteiro (día 16), Serantes (día 23) e Santa Mariña (día 30).
O programa terá continuidade no mes de decembro con actuacións en Papoi (día 7), San Felipe (día 14) e Covas (día 21).
ACTIVIDADE NO 2027
O Plan de Barrios retomará a súa actividade en xaneiro de 2027. O primeiro barrio no que se intervirá será o Ensanche A, durante a semana do 11 de xaneiro. Posteriormente, as actuacións continuarán na Xunta Veciñal (día 18) e en Mandiá (día 25).
En febreiro, o programa chegará a San Pablo (día 1), Ultramar (día 8), Viladóniga (día 15) e Canido (día 22).
No mes de marzo están previstas actuacións en Esmelle (día 1), Caranza (día 8), A Cabana (día 15) e Centro (día 23).
Finalmente, en abril, desprazarase a San Román (día 5), Brión (día 12), San Xurxo (día 19) e Cariño (día 26).
O Plan de Barrios foi posto en marcha por primeira vez no ano 2011, pero deixou de executarse nos últimos anos. O Goberno municipal decidiu recuperalo co obxectivo de reforzar o mantemento dos espazos públicos, mellorar os servizos municipais e manter un contacto directo coas necesidades e demandas dos veciños e veciñas.
