Na madrugada do pasado 21 de febreiro, o busto de Manuel Fraga, situado no parque da Alameda do seu municipio natal -o lucense de Vilalba- foi obxecto dun novo acto vandálico reivindicado por un grupo de carácter radical independentista vasco, alleo á dinámica política de Galicia e descoñecedor da súa relevancia política.
Manuel Fraga foi presidente da Xunta de Galicia durante máis de quince anos e unha figura determinante na consolidación institucional e no desenvolvemento político, económico e social da nosa Comunidade Autónoma. Máis alá das lexítimas diferenzas ideolóxicas, a súa traxectoria forma parte da historia democrática de Galicia e tamén do conxunto de España, como un dos pais da Constitución democrática de 1978.
Galicia é unha terra recoñecida pola súa estabilidade, pola convivencia pacífica e polo respecto institucional. Feitos como o ocorrido non só supoñen un ataque contra un símbolo ou unha figura pública, senón que constitúen unha agresión ao patrimonio común e aos valores democráticos que nos demos como sociedade. A violencia, o vandalismo non forman parte do debate democrático, senón que o deterioran gravemente.
Desde esta Cámara, institución que tantas veces acolleu ao ex-presidente da Xunta de Galicia, entendemos que o respecto ás persoas que desempeñaron responsabilidades públicas, así como aos símbolos e elementos patrimoniais que as lembran, é unha obriga democrática básica. Máis alá das lexítimas diferenzas políticas e ideolóxicas que enriquecen o debate democrático, cómpre insistir na responsabilidade compartida de todas as forzas con representación institucional de preservar a convivencia e o respecto.
En consecuencia, o Parlamento de Galicia:
1º- Condena firmemente o acto vandálico perpetrado contra o busto de Manuel Fraga en Vilalba, por consideralo un ataque ao patrimonio público e aos valores democráticos.
2º- Manifesta o respecto institucional da Cámara galega cara á figura de Manuel Fraga pola súa contribución ao desenvolvemento e consolidación da autonomía galega, máis aló das lexítimas discrepancias políticas.
3º- Reafirma o compromiso común coa convivencia democrática e co rexeitamento de calquera forma de violencia e vandalismo.
