O PPdeG lamenta o «novo castigo» do Goberno central a Galicia ao decidir, de xeito unilateral, extinguir os convenios que permitían aos concellos pequenos colaborar na reserva de prazas e no apoio aos maiores dentro do Programa de Turismo do Imserso. Fronte a este «furto» aos galegos e galegas por parte do Executivo de Sánchez, cun BNG que «consente», os populares reivindican a «defensa do rural e dos maiores» e esixen, a través de iniciativas en varias Cámaras, que se recupere este servizo municipal.
Así o manifestou a secretaria xeral do PPdeG, Paula Prado, durante unha reunión en Lalín, un dos municipios afectados pola decisión unilateral do Goberno central. Estivo acompañada do alcalde e senador, José Crespo, e por representantes políticos doutras zonas da comarca, tamén prexudicadas, como A Estrada e Valga. «Poñemos en valor o dereito das persoas maiores a ter unha atención máis personalizada, como a que se viña dando dende os concellos que colaboran co Imserso», sinalou Prado, que asegurou que o PPdeG «seguirá pelexando» no Congreso e no Senado para que o Goberno de Sánchez reconsidere este asunto. Ademais, o PP de Lalín levará o asunto ao pleno municipal deste mes de xuño.
Os populares explicaron que o Ministerio de Dereitos Sociais, Consumo e Axenda 2030, a través do Imserso, comunicou por carta aos concellos afectados que os convenios existentes para a reserva de prazas no Programa de Turismo do Imserso quedan extinguidos, xustificando a decisión cunha explicación meramente formal e sen que houbera diálogo cos municipios afectados. Con esta decisión, a partir da tempada 2026/2027, as persoas residentes nestes municipios xa non poderán utilizar o sistema de reserva de prazas a través do seu concello, debendo realizar elas mesmas as reservas por internet ou mediante axencias de viaxes.
José Crespo, explicou os inconvenientes deste novo sistema, xa que se elimina a atención personalizada que gozaban nos concellos as persoas que, en moitos casos, teñen dificultades para realizar xestións telemáticas e administrativas.
O BNG DI ‘SI’ A SÁNCHEZ E ‘NON’ A GALICIA
A secretaria xeral dos populares galegos pregúntase por que, «unha vez máis», se castiga a Galicia por parte do Executivo de Sánchez que, sen embargo, «non castiga a outras comunidades como País Vasco ou Cataluña».
Tamén critica o papel do BNG ante agravios coma este, xa que, de novo, «din si a Sánchez e non a Galicia». Prado sinala que os independentistas galegos están «a deriva», referíndose a acontecementos recentes como a visita do Papa, na que o BNG e Podemos foron os únicos partidos en ausentarse do Congreso.
Igualmente, lamentou o apoio dos independentistas galegos á CIUG, a comisión organizadora das probas de acceso á universidade, a PAU, cuxos erros na convocatoria deste mes de xuño afectaron gravemente ao alumnado de varias materias. «O BNG non está ao carón das familias. Pero agora xa entendemos porque defenden amplamente á CiUG: o seu presidente é do BNG», destacou.
A número dous dos populares galegos tamén afea o apoio do BNG ao Goberno de Sánchez, lembrando que a última «liña vermella» dos independentistas galegos é que haxa unha condena por financiación ilegal, obviando os casos de corrupción e a actualidade que rodea ao Executivo de Sánchez. «Moven os marcos ao seu interese pero os recortes que o Goberno de España fai aos galegos e galegas non lles importan», puntualiza a secretaria xeral do PPdeG.
JOSÉ CRESPO REIVINDICA UN SERVIZO DE PROMIXIDADE
O rexedor lalinense e senador popular fixo referencia ao convenio do Imserso como un servizo «de proximidade», que viña funcionando durante décadas. «O Concello non só informaba, senón que tamén resolvía dúbidas, organizaba grupos e facilitaba desprazamentos. Este apoio era especialmente importante para persoas maiores, con dificultades dixitais, de mobilidade ou de tramitación», explicou.
Para Crespo, a decisión unilateral do Goberno central, «deixa ás persoas maiores do rural en peor situación que as das cidades» e rompe a dimensión comunitaria das viaxes. «Moitas persoas maiores participaban porque viaxaban con veciños, amizades e grupos organizados», apuntou. Tamén lamentou que esta decisión incremente a fenda dixital e contribúa a baleirar servizos no rural.
