O delegado do Goberno en Galicia, Pedro Blanco, reivindicou en Santiago de Compostela o programa do Kit Dixital, do Ministerio para a Transformación Dixital e da Función Pública, como a maior panca pública de modernización para 52.000 pemes e autónomos galegos. O delegado comprobou na cafetaría compostelá Liam Brunch os efectos deste plan, xunto aos seus xerentes Tinela Costela Bosnea e Omar Alonso.
O delegado destacou o impacto deste programa de dixitalización do Goberno, que dota con 210 M€ do Plan de Recuperación a Galicia. O seu impacto repercute a empresas do 95% dos concellos galegos das catro provincias. Atendendo a estes entes, benefícianse 19.500 empresas na Coruña, 7.700 en Lugo, 5.800 en Ourense e 19.000 en Pontevedra. Cos datos na man, Pedro Blanco fixo fincapé en que o Goberno “chega a cada barrio, a cada cidade e vila de Galicia: levamos a dixitalización a todo o territorio”.
“O Goberno está a facer a maior aposta pública pola dixitalización das pequenas empresas na historia do noso país”, reivindicou o delegado, quen salientou a súa acción para “modernizar negocios reais, axudar a quen crea riqueza e fixa poboación no territorio”. Subliñou tamén que o Kit Dixital “non é só unha axuda económica, é unha estratexia de futuro para que ningunha empresa quede atrás na transición dixital”.
O sector da hostalaría é o maior beneficiado por este programa, xogando un papel clave na súa dixitalización e a resultante axilización do traballo cotián mediante a tecnoloxía. É o caso do Liam Brunch, que coa partida recibida puido obter medios técnicos para dinamizar os servizos e a atención á súa clientela. Unha das súas xerentes, Tinela Costela Bosnea, salientou a importancia destes fondos para eles: “Sen estes medios aínda estariamos no lapis e o papel para, por exemplo, tomar as peticións dos cliente”. Por motivos coma este, o delegado puxo en valor a repercusión do Kit Dixital en toda a hostalaría e especialmente no Liam Brunch, de Santiago.
