O Circuíto Municipal de Carballo volverá converterse este sábado 12 de setembro nun dos grandes puntos de encontro do automobilismo galego coa celebración do 23º Autocross de Carballo, proba puntuable para o Campionato de Galicia de Autocross 2026.
Hoxe presentamos a competición coa participación do alcalde, Daniel Pérez; o concelleiro de Deportes, Daniel Barreiro; Ernesto Rumbo, do Club Rally Coruña, organizador da proba; José Manuel Valeiro, comisario deportivo, e Víctor Fernández Rodríguez, responsable da cronometraxe.
Unha vez máis, a participación será moi ampla. A falta dunhas horas para o peche das inscricións, a relación provisional inclúe máis de 60 pilotos entre as distintas categorías: turismos, turismos series, carcross e carcross júnior. Unha cifra que anticipa unha xornada de grande intensidade deportiva e que volve poñer de manifesto a capacidade de convocatoria do circuíto carballés.
Nese sentido, Ernesto Rumbo puxo especialmente en valor a vinculación histórica de Carballo co mundo do motor e a relevancia que acadou o municipio dentro do calendario automobilístico. Rumbo destacou que Carballo é o único concello galego que acolle dúas probas de ámbito estatal, unha circunstancia que, ao seu xuízo, evidencia tanto a calidade das instalacións como a capacidade organizativa e a tradición automobilística existente no municipio.
O alcalde, Daniel Pérez, incidiu tamén no valor do circuíto municipal como infraestrutura deportiva e como elemento de proxección exterior de Carballo, como quedou de manifesto a semana pasada co Rally Terra de Galicia . “O automobilismo forma parte da historia deportiva de Carballo e temos a sorte de contar cun circuíto que nos permite seguir sendo escenario de competicións de primeiro nivel. Cada unha destas probas atrae pilotos, equipos e afeccionados de distintos puntos de Galicia e de fóra, e contribúe tamén a reforzar a proxección do noso concello”, destacou o alcalde.
Pola súa banda, o concelleiro de Deportes, Daniel Barreiro, agradeceu o traballo do Club Rally Coruña e de todas as persoas implicadas na organización. “Detrás dunha proba destas características hai moitísimas horas de traballo e un dispositivo humano e técnico moi importante. Desde o Concello queremos agradecer ese esforzo e convidar á afección a achegarse este sábado ao circuíto para desfrutar dunha xornada que promete moito espectáculo”, sinalou.
Competición desde as 10.30 horas
A actividade deportiva do sábado comezará pola mañá, despois das verificacións administrativas e técnicas e do briefing dos participantes.
O warm up está previsto para as 10.30 horas e os adestramentos oficiais comezarán ás 11.30 horas. Xa pola tarde, a primeira manga clasificatoria disputarase ás 15.00 horas e a segunda ás 16.30 horas.
As finais B están programadas a partir das 17.50 horas, mentres que as finais A comezarán ás 18.00 horas. A entrega de premios e trofeos está prevista para as 19.45 horas. O horario definitivo poderá adaptarse en función do número de participantes de cada clase.
O formato deportivo prevé dúas voltas de warm up, catro nos adestramentos oficiais, seis nas mangas clasificatorias e finais B e oito voltas nas finais A.
A celebración do 23º Autocross Carballo reforza a posición do noso concello como unha das grandes referencias galegas do automobilismo, tanto pola continuidade das competicións como pola singularidade dun circuíto que permite ao municipio manter presenza nos calendarios galego e estatal.
