Varios particulares informaron do accidente ao 112 Galicia sobre as 11:00 horas desta mañá. Segundo os testemuños, tratábase da saída de vía dun turismo que rematou envorcado na EP-9305, quilómetro 7.8, en Ribadumia. Indicaban ademais que o condutor podía estar atrapado no interior do vehículo.
Así, ata o lugar tras ser informados polo 112 Galicia, desprazáronse de inmediato ademais do persoal do Servizo de Urxencias Sanitarias de Galicia-061, os Bombeiros de Ribadumia e os axentes da Garda Civil de Tráfico. Así mesmo, os xestores de emerxencias puxeron os feitos en coñecemento da Policía Local e dos efectivos de Protección Civil.
Tras rematar a súa intervención, os Bombeiros confirmaron a excarceración do ferido, que foi trasladado polo persoal sanitario ao centro hospitalario de referencia.
Saída de vía na AP-9
Por outra banda, dez minutos antes das 12:00 horas deste mediodía, o 112 Galicia recibía o aviso de varios alertadores doutro accidente en Pontevedra.
Ao igual que no caso anterior, tratouse dunha saída de vía na AP-9, entre os quilómetros 129-130, na localidade de Pontevedra. Segundo a información recibida no 112 Galicia, o turismo, tras saírse da vía chocou contra a mediana da autoestrada e unha muller resultou ferida, polo que decontado pasouse aviso ao Servizo de Urxencias Sanitarias de Galicia-061. Igualmente foron informados os axentes de Tráfico, da Policía Local, os Bombeiros de Pontevedra, os efectivos da Agrupación de Voluntarios de Protección Civil e o persoal de Autoestradas.
