O delegado do Goberno en Galicia, Pedro Blanco, animou á xuventude galega a solicitar as becas do Ministerio de Educación para o curso 2026-2027, cuxo prazo comeza mañá, 7 de abril. Están dotadas con 2.559 millóns de euros e poden tramitalas os estudantes de niveis postobrigatorios ata o 18 de maio ás 15.00 horas.
Atendendo á convocatoria do vindeiro curso, o delegado puxo en valor o investimento histórico que realiza o Goberno, que acada a novena subida consecutiva desde o 2018, sumando hoxe 1.000 millóns máis que nese ano. Este reforzo terá impacto en Galicia, onde 54.000 familias reciben axudas actualmente mediante unha inxección económica de 132 M€, un 59% máis que hai nove anos.
Pedro Blanco fixo fincapé en que estas políticas desenvolvidas polo Ministerio “permiten garantir a igualdade de oportunidades e reforzar o acceso á educación pública, asegurando o futuro da mocidade galega” e garantindo que ningún estudante vexa limitado o seu futuro pola situación económica da súa familia.
O delegado salientou tamén o apoio do Goberno ao sistema educativo público galego nos últimos anos. Así, explicou que transferiu á Xunta 308 millóns de euros para reforzar o ensino non universitario, dos que 200 millóns se destinaron a Primaria, ESO e Bacharelato e 108 millóns á Formación Profesional, permitindo crear máis de 42.000 novas prazas en ciclos formativos.
Principais novidades en Galicia para o vindeiro curso
As convocatorias actualizan os limiares de patrimonio nunha media do 10%. Non hai cambios nos de renda.
Os bolseiros universitarios e de ensinos artísticos superiores con matrículas parciais que cursen entre 48 e 59 créditos poderán percibir parte da bolsa de renda e da bolsa de residencia (350 euros por cada unha delas).
O alumnado con discapacidade de entre o 25 e 64% verá adaptados os requisitos académicos relativos á carga lectiva exixible para obter bolsa: consideraráselles matricula completa a efectos de bolsa con 45 créditos (en lugar de 60).
