A Praza da Constitución de Ferrol converterase, do 23 ao 26 de abril, no primeiro gran punto de encontro co libro en Galicia neste 2026, inaugurando unha nova edición das Feiras do Libro cunha programación que combina literatura, música, pensamento e actividades para todos os públicos.
A apertura oficial terá lugar o propio 23 de abril, coincidindo co Día do Libro, cun acto inaugural no que a ferrolá Cristina Otero Correa será a encargada de dar o pregón. Docente de música, investigadora e autora, Otero Correa constrúe unha traxectoria marcada polo compromiso coa educación e coa xustiza social, entre Galicia e Uganda. A súa obra Xanelas ao mundo, dirixida ao público infantil, nace precisamente desa experiencia vital e propón a música como linguaxe común para o encontro entre culturas.
Durante catro días, a feira ofrecerá unha programación ampla que combina presentacións, conversas literarias, espectáculos familiares, actividades musicais e sinaturas de libros, configurando un espazo aberto á cidadanía no que o libro se converte en eixo vertebrador da vida cultural da cidade. A carpa de actividades será un dos grandes epicentros desta proposta, acollendo desde obradoiros infantís ata encontros arredor da memoria, a creación ou a literatura clásica.
Dani Bermúdez e Fidel de Tovar, referentes do manga español
Un dos momentos máis salientables da programación será o encontro con Dani Bermúdez e Fidel de Tovar, dous dos nomes máis destacados do manga español contemporáneo. Autores de títulos como Arashiyama, la montaña de los deseos, Liquid Memories ou Perfeddion, obra recoñecida co Premio de Bronce nos Japan International MANGA Awards, achegarán ao público a súa experiencia creativa e a evolución do manga feito no Estado. A súa traxectoria, avalada por múltiples premios no Manga Barcelona, converte esta cita nunha oportunidade única para coñecer de primeira man o proceso de creación neste xénero.
Unha carpa de actividades viva e diversa
A carpa de actividades será o verdadeiro corazón da Feira do Libro de Ferrol, cunha programación continua e pensada para públicos de todas as idades, que combina propostas lúdicas, escénicas, literarias e divulgativas ao longo das catro xornadas.
O xoves 23 de abril, tras o acto inaugural e o pregón de Cristina Otero Correa, a programación continuará cun obradoiro de Pokémon para nenos e nenas, centrado en xogos de cartas, retos e dinámicas participativas.
O venres 24 de abril abrirase cunha proposta escénica familiar, coa representación de Alicia a cargo de Pedras de cartón, un espectáculo pensado para estimular a imaxinación. A continuación, desenvolverase unha conversa arredor da figura de Begoña Caamaño e a obra Begoña ou o pracer da amizade, de Beatriz Maceda, e pechará a xornada un encontro arredor da memoria —social, familiar e persoal— coa participación de Abril Camino, Olaia Sendón e María Nieto.
O sábado 25 de abril estará marcado pola diversidade de formatos e contidos. A xornada comezará cunha lectura-homenaxe a Otero Pedrayo, coa participación de representantes do Ateneo Ferrolán, do Concello de Ferrol e da Fundación Otero Pedrayo, acompañada de música tradicional galega. Pola tarde, o público poderá gozar do contacontos musical Oto o xigante comenubes, seguido do encontro arredor da creación de manga no panorama nacional con Fidel de Tovar e Dani Bermúdez, acompañados por Bruno Lorenzo Teijo.
Finalmente, o domingo 26 de abril ofrecerá unha programación especialmente centrada no público familiar e na divulgación literaria. A xornada incluirá a presentación musical do libro Xanelas ao mundo a cargo de Cristina Otero Correa xunto ao ilustrador e músico Sergio Sande; un obradoiro participativo arredor do porquiño de San Martiño; a representación teatral Contos de lobo de Ghazafelhos; e a presentación da tradución ao galego de Medea e Fedra de Séneca, nun diálogo entre o tradutor Fernando Domènech e a neuróloga e filóloga Carmen Lema.
Un conxunto de propostas que converten a carpa nun espazo dinámico, aberto e interxeracional, onde a literatura dialoga coa música, o teatro, o pensamento e a creación contemporánea.
