Se algo está claro neste 2026 é que o nome de 9Louro xa non é unha promesa. É unha realidade que soa co volume ao máximo. O vindeiro venres 26 de xuño, a Praza do Concello converterase no escenario dunha das propostas máis potentes e magnéticas da nova escena urbana galega: un directo onde o trap, a electrónica e o orgullo identitario fusiónanse sen complexos.
Detrás do alias de 9Louro está Martín Louro (Muros, 2004), un artista que pasou de producir música na intimidade do seu cuarto a converterse nun fenómeno de masas capaz de colgar o cartel de esgotado alá onde vai. Criado nunha contorna cun forte ADN musical —o seu irmán maior é Xanma Louro, de The Rapants—, Martín atopou o seu camiño tras cursar un ciclo superior de Electrónica e Electricidade. Esa mesma enerxía conecta agora os seus cables cos mellores ritmos da música urbana.
A súa carreira profesional arrincou en 2024 co lanzamento do seu primeiro álbum, Nove noves, da man do produtor Yuly. Porén, o punto de non retorno chegou a finais de 2025 cun fito histórico: o artista encheu a igrexa da Universidade de Santiago nun concerto gratuíto que deixou a ducias de persoas ás portas.
Aquel aviso converteuse en proxección internacional coa súa actuación no festival Emigrason de Bruxelas (na mítica sala Tricoterie), unha cita clave para a música en galego no corazón de Europa. Ao seu regreso, 9Louro deu outro golpe definitivo na mesa: esgotou as entradas para a Sala Capitol de Santiago en tan só 30 minutos. Sen red flags. Só sold out.
O concerto na Praza do Concello será a oportunidade perfecta para gozar en directo de Amorrer, o seu segundo álbum de estudio lanzado o pasado 19 de febreiro de 2026. Un traballo composto por 14 temas que consolidan o seu universo propio. Nel, o amor, o desamor, o sexo, as noites longas e unha marcada melancolía xeracional conviven a golpe de trap, bases electrónicas e momentos orgánicos.
9Louro é un deses artistas que fan que o público chegue cedo… e aínda así corra o risco de quedar fóra. A cita coa nova vangarda da música galega promete ser inesquecible.
