O delegado do Goberno en Galicia, Pedro Blanco, defendeu hoxe na Coruña “o papel protagonista do Goberno na ampliación do parque público de vivenda en Galicia”. Fíxoo durante a presentación do novo proxecto para a construción de 11 novas vivendas de alugueiro asequible promovidas pola Entidade Estatal adscrita ao Ministerio de Vivenda e Axenda Urbana, CASA 47 na rúa Adelaida Muro.
Xunto á alcaldesa da Coruña, Inés Rey, e o subdelegado do Goberno na provincia, Julio Abalde, Pedro Blanco subliñou que “a vivenda é hoxe a primeira preocupación social e para este Goberno é unha prioridade política”. Por iso, insistiu en que “non pode tratarse como un negocio, ten que tratarse como un dereito e os dereitos deféndense desde o público”, afirmou.
O delegado salientou o liderado da ministra Isabel Rodríguez e lembrou que dous de cada tres euros investidos en vivenda pública en Galicia proceden do Goberno de España, nun esforzo que cualificou de “histórico” para facer fronte á emerxencia habitacional. Así, lembrou que, “malia que a vivenda é unha competencia autonómica, o Goberno está a transferirlle fondos sen precedentes á Xunta e a actuar con lealdade e transparencia para dar resposta a esta situación”.
Pedro Blanco destacou que só na cidade da Coruña o Goberno mobiliza 25,5 millóns de euros para impulsar 690 vivendas, entre rehabilitación de barrios e construción de alugueiro social, mentres que na provincia da Coruña o investimento supera os 41 millóns de euros.
Así mesmo, recoñeceu o traballo da alcaldesa Inés Rey e o “seu compromiso e liderado nas políticas de vivenda desta cidade”, destacando a importancia da colaboración institucional para ampliar a oferta pública e facilitar o acceso a unha vivenda digna. O delegado concluíu reiterando o compromiso do Goberno de seguir apoiando á Coruña “para garantir a vivenda, porque é garantir un dereito básico da cidadanía”.
11 vivendas públicas
En relación co proxecto presentado, o delegado explicou que se trata dunha promoción de 11 novas vivendas públicas para alugueiro asequible, que se construirán nunha parcela de 371 m² do número 24 da rúa Adelaida Muro, situada no barrio de Monte Alto. O edificio terá catro andares, con vivendas exteriores de entre un e tres dormitorios todas elas con garaxe e trasteiro.
As vivendas serán permanentemente públicas e os contratos de alugueiro poderán alcanzar ata 75 anos de duración cun prezo que non poderá superar o 30% da renda media do fogar de cada territorio, vinculando así os prezos á capacidade económica da cidadanía e non ao que marca o mercado”.
“O modelo CASA 47 non busca só construír vivendas, senón crear un parque público estable e permanente que garanta o dereito á vivenda”, afirmou o delegado, quen avanzou que o proxecto estará redactado este verán e que a intención é licitar as obras a continuación para tratar de iniciar a construción este mesmo ano.
