O delegado do Goberno en Galicia, Pedro Blanco, e o alcalde de Lugo, Miguel Fernández, anunciaron hoxe que o Goberno de España iniciará de maneira inminente o procedemento para declarar O Vello Cárcere como Lugar de Memoria Democrática, coa publicación no BOE da incoación do expediente prevista para o vindeiro mes de maio. Fixérono durante unha visita este xoves ao edificio da capital lucense, acompañados pola subdelegada na provincia, Olimpia López.
Blanco cualificou este avance como “un paso decisivo” e subliñou que esta declaración supón “un acto de xustiza, de reparación e de dignidade”, ao tempo que reafirma o compromiso institucional coa memoria das vítimas da represión. “En Galicia, xa son 3 os Lugares de Memoria Democrática: O Pazo de Meirás, as Illas de San Simón e San Antón e a cidade de Ferrol, ao que se engadirá proximamente O Vello Cárcere de Lugo”.
Ademais, o delegado puxo de relevo “o respecto absoluto do Ministerio ao valor histórico deste espazo de represión política e a súa función actual como lugar de difusión de valores democráticos, que o converten nun exemplo paradigmático deste recoñecemento”.
O delegado lembrou o significado histórico deste espazo por ter sido un dos principais lugares de represión política en Galicia durante a Guerra e a posguerra, polo que pasaron arredor de 5.000 persoas entre 1936 e 1940, e onde se viviron “situacións de extrema dureza, con persecución, torturas e condicións inhumanas”. Neste senso, incidiu na importancia de preservar e transmitir esta memoria ás novas xeracións, “para explicar o que ocorreu, evitar que se banalice e impedir que caia no esquecemento”.
Blanco puxo tamén en valor a transformación deste edificio, que pasou de ser un símbolo de represión a converterse nun espazo de cultura, arte e convivencia, mantendo viva a memoria democrática desde unha perspectiva pedagóxica e cidadá.
Cooperación co Concello
Durante a súa intervención, o delegado destacou a colaboración institucional co Concello de Lugo e recoñeceu o traballo do alcalde, Miguel Fernández, para avanzar neste recoñecemento. “Cando hai diálogo e cooperación, os proxectos avanzan”, afirmou.
Así mesmo, enmarcou este anuncio no cumprimento dos compromisos adquiridos polo Goberno coa cidade, lembrando actuacións como os 9 millóns de euros destinados á nova comisaría da Policía Nacional, os avances na intermodal, que será unha realidade este mesmo ano, ou a mellora das conexións ferroviarias que permitirán viaxar á capital no mesmo día.
“Neste tempo estamos a sacar dun caixón cuestións fundamentais para Lugo e a materializar proxectos que levaban anos parados”, sinalou, destacando que o impulso á memoria democrática se suma a estes avances estruturais.
“Proxectos que non ocorren por casualidade, suceden porque hai un Goberno e un Concello que traballan polo mellor para esta cidade”, sinalou o delegado, quen puxo en valor “unha forma de facer política discreta, sen facer ruído, constante e que dá resultados”.
