A Biblioteca Provincial da Deputación da Coruña desenvolve ao longo deste mes unha programación especial de actividades para celebrar o libro e a lectura, coincidindo co Día do Libro
Entre as propostas destaca a presentación de Os libros durmidos, unha obra creada por María Canosa e Laura Suárez que afonda na historia da Biblioteca e na riqueza dos seus fondos. O acto terá lugar este xoves 23 de abril, ás 18:30 horas, no segundo andar da sede da Biblioteca, situada na rúa Rego de Auga, 37, na Coruña, con entrada libre ata completar aforo.
O libro nace no marco das iniciativas impulsadas pola Biblioteca para conmemorar o seu 180 aniversario e propón unha viaxe de descuberta e fascinación arredor da palabra escrita. A obra combina ficción e memoria para achegar ao público a historia da institución, incorporando tamén a presenza de figuras relevantes vinculadas a ela ao longo de case dous séculos.
María Canosa (Cee, 1978), enxeñeira de formación e autora cunha ampla traxectoria na literatura, especialmente no ámbito infantil e xuvenil, asina o texto. Pola súa banda, Laura Suárez (Dumbría, 1994), ilustradora e tamén escritora, encárgase de dar vida á historia a través dun coidado traballo gráfico.
Ademais da presentación, ese mesmo día organizarase unha visita guiada polos fondos máis singulares da Biblioteca, aberta ao público previa reserva de praza no teléfono 981 415 176 ou a través do correo electrónico biblioteca.info@dacoruna.gal.
A programación complétase con diferentes actividades de animación á lectura e formación que se están a desenvolver en distintos puntos da provincia ao longo destas semanas.
Para máis información, as persoas interesadas poden dirixirse ao correo biblioteca.info@dacoruna.gal.
