Paula Prado di que o que pretenden os independentistas é desconectar a Galicia do mapa
A deputada popular apunta que “autogoberno non é acumular transferencias ao chou”, como pretende o BNG, senón do que se pode facer mellor que o Goberno central
“Necesitamos conexións aéreas estables, estratéxicas e coordinadas; non que a señora Pontón veña a facer propaganda cos aeroportos nin que o señor Besteiro se poña de perfil”, dixo hoxe a secretaria xeral do PPdeG e viceportavoz do Grupo Parlamentario Popular, Paula Prado. Neste punto, defendeu un “modelo en rede” que garanta a competitividade dos aeroportos galegos.
Para a deputada popular, a iniciativa do BNG na que reclama a transferencia a Galicia das competencias en materia de aeroportos, é un intento de lavado de cara e de botar balóns fóra, xa que, tal e como sinalou, nos asuntos clave para o futuro económico e social de Galicia, os independentistas sempre “pulsan o botón do non”. “Aquí, moi bravos, pero, en Madrid, moi mansos”, engadiu.
Neste senso, salientou a falta de análise e rigor e afondou nas consecuencias que tería para a nosa Comunidade: desconectar a Galicia do mapa e a súa perda de competitividade. Por iso, insistiu en que as competencias en materia de aeroportos deben seguir correspondendo ao Goberno central, ao tempo que advertiu de que a xestión por parte das autonomías podería ser inconstitucional, tal e como xa alertou AENA.
Segundo apuntou, “autogoberno non é acumular transferencias ao chou”, senón xestionar aquelas para as que Galicia está máis preparada. “Non falamos de transferencias ao por maior, senón do que podemos facer mellor que o Goberno central”, remarcou. Neste punto, instou aos independentistas a que apoien as transferencias que a nosa Comunidade si pode xestionar de maneira máis áxil e eficiente por proximidade e experiencia; tales como ás do ingreso mínimo vital, a AP-9, aeródromos non comerciais e ás autorizacións de traballo das persoas estranxeiras.
Asemade, fixo referencia ao “agravio comparativo sen precedentes” ao que ten sometido o Goberno central a Galicia con respecto a outras Comunidades: peor conectividade, rutas perdidas e billetes máis caros. E mencionou, asemade, os 3.000M€ da débeda que mantén Pedro Sánchez coa dependencia e que o Goberno central “fannos pagar” por unha das autopistas máis caras de España, mentres as xestionadas polo Executivo galego “son as máis baratas” do país.
DIÁLOGO PARA DEFINIR O FUTURO AÉREO GALEGO
Fixo fincapé, tamén, en que “fronte á nada” que fai o Goberno de Pedro Sánchez en materia de infraestruturas e mobilidade, está o Executivo de Alfonso Rueda que inviste 13M€ ao ano nos tres aeroportos galegos en promoción turística en orixe. E que, como xa anunciou, colaborará, tamén, aportando 100.000€ por cada nova ruta confirmada. Neste punto, avogou polo diálogo entre administracións para que todas se “impliquen para definir o futuro das conexións aéreas en Galicia”.
Sobre a proposta do BNG na que solicita o traspaso de 50 competencias, Paula Prado advertiu de que “non teñen ningún plan, só queren ruído e pancartas, pero ningún ben para Galicia”. Recalcou a hipocrisía dos nacionalistas que reclaman unha policía galega, pero que, pola contra, son incapaces de pedir que se cubras as 163 vacantes na Unidade de Policía Nacional Adscrita de Galicia (UPA); que piden unha ordenación do litoral e, ao mesmo tempo, son contrarios a instalar ningún proxecto na costa; ou que solicitan unha planificación e xeración enerxética, pero non queren nin enerxía eólica nin solar nin o biogás.
