O delegado do Goberno en Galicia, Pedro Blanco, reuniu hoxe aos subdelegados da Coruña, Ourense e Pontevedra e á subdelegada de Lugo para reforzar a coordinación e a resposta do Estado diante dos lumes forestais en Galicia. A reunión da Comisión de Asistencia ao Delegado repasou os procedementos de activación de medios e de actuación interna diante dos distintos escenarios operativos que se poden dar nun incendio forestal, e que veñen determinados pola normativa estatal e os plans especiais autonómicos de Galicia. Tamén avaliaron o impacto do novo RD que aprobou en xaneiro o Goberno e que mellora a interoperabilidade dos dispositivos, reforza a seguridade do persoal e fortalece a cooperación entre administracións.
Pedro Blanco advertiu da necesidade de revisar permanentemente estes protocolos operativos pois a evolución do clima e das características dos lumes así o esixen: “Somos conscientes de que temos que estar preparados todo o ano”. E puxo como exemplo os recentes lumes ocorridos en Ponteareas e Carballo aos que se desprazaron os medios estatais de extinción no marco da colaboración permanente coa Xunta, administración que exerce as competencias de extinción. Na reunión, o delegado renovou este compromiso de asistencia e de colaboración permanente, que tivo como máximo expoñente o despregamento de medios estatais posto a disposición de Galicia durante a pasada ola de incendios de agosto.
28,5M€ na reparación dos danos dos lumes de 2025
Na reunión, o delegado cifrou en 28,5 millóns de euros o investimento do Goberno en Galicia, a través de distintos ministerios para reparar danos en infraestruturas, no medio natural e en axudas a afectados polos incendios acontecidos no verán pasado. Esta cantidade resulta de sumar as actuacións de recuperación de terreo forestal en Lugo e Ourense (9,5 millóns de euros) e de cauces fluviais (4,7 millóns de euros), a reparación de estradas (3,8 millóns de euros) e de vías ferroviarias (5,5 millóns de euros) e as axudas a agricultores e gandeiros (case 5 millóns de euros).
Pedro Blanco sinalou que esta cifra é provisional, por canto se están analizando as peticións de subvencións solicitadas por concellos e deputacións por danos causados nas súas infraestruturas e equipamentos e que xestiona o Ministerio de Política Territorial e Memoria Democrática.
Semana da Administración Aberta 2026
A reunión da Comisión de Asistencia ao Delegado aprobou a participación da Delegación e das catro subdelegacións na Semana da Administración Aberta, que se celebrará entre o 18 e o 24 do próximo mes de maio. Ao igual que en anos anteriores, organizaranse xornadas de portas abertas, accións a nivel sectorial e con centros educativos, para dar a coñecer o funcionamento da Administracións á cidadanía.
Esta é unha iniciativa promovida pola Alianza para o Goberno Aberto a nivel mundial que ten como obxectivo difundir os seus principios e prácticas para crear unha cultura, compartida polas administracións públicas e os cidadáns, baseada nos valores de transparencia e integridade, participación cívica e promoción dos dereitos fundamentais, así como a rendición de contas.
