Catro persoas resultaron feridas e foron trasladadas ao seu centro hospitalario de referencia tras sufrir un accidente de tráfico no que se viron implicados dous coches e un camión na N-634, ao seu paso polo concello de Curtis.
O sinistro produciuse á altura do quilómetro 664 contra as 20:00 horas deste serán, momento no que o 112 Galicia tivo constancia do suceso a través do sistema automático de chamada de emerxencia (eCall) dun dos vehículos afectados e, de xeito simultáneo, polas chamadas de varios particulares que solicitaban asistencia médica para os ocupantes.
Desde o Centro Integrado de Atención ás Emerxencias (CIAE) 112 Galicia coordinouse de inmediato un operativo no que participaron o Servizo de Urxencias Sanitarias de Galicia-061, os Bombeiros de Betanzos, o GES de Curtis, a Garda Civil de Tráfico e os efectivos de Protección Civil da localidade.
Unha vez no punto, os servizos de emerxencia asistiron ás catro vítimas antes de proceder á súa evacuación. A causa do accidente, a circulación na estrada nacional viuse afectada polo corte dun dos carris, aínda que a intervención dos axentes e dos equipos de mantemento permitiu que o tráfico quedase restablecido con normalidade pouco despois sen que se rexistrasen retencións de importancia.
