O deputado do BNG Secundino Fernández defendeu na Comisión 2ª unha iniciativa para reclamarlle á Xunta que actúe contra o uso de herbicidas en base a glifosato e derivados nos labores de limpeza das vías de comunicación, co obxectivo de evitar a contaminación de augas e os posibles efectos daniños na saúde das persoas e da fauna.
Na súa intervención, Fernández subliñou que o uso de produtos químicos nas beiravías de forma masiva está prohibido, pois a substancias, explicou, son arrastradas coa auga e a choiva e acaban filtrándose no nivel freático e chegando aos ríos, con consecuencias negativas para a fauna e a flora, e o risco tamén de afectar ás fontes e pozos de consumo humano.
A maioría dos herbicidas, usados por empresas de mantemento contratadas polas administracións, son químicos e conteñen glifosato, unha sustancia sobre a que OMS leva décadas advertindo, até o punto de tela clasificado como «probablemente canceríxena para os seres humanos», baseándose nunha forte evidencia de que o é para os animais.
Secundino Fernández destacou ademais que a lexislación vixente (real decreto 1311/12) establece que en ámbitos non agrarios «os tratamentos nas redes de servizos soamente poderán realizarse con produtos fitosanitarios autorizados para estes usos, naqueles casos ou tramos en que non sexa viable a utilización de medios mecánicos ou outros alternativos, e sempre en épocas nos que sexa menos probable que se produzan choivas».
«E resulta que organismos públicos utilizan de xeito habitual os herbicidas con glifosato», denunciou o deputado nacionalista, salientando que a Administración estatal xa ten identificado o glifosato como contaminante específico de conca nos plans hidrolóxicos. «O propio Ministerio de Transición recoñece que a análise dos datos feitos sobre o glifosato nos últimos 5 anos evidencian que pode supor un risco nas augas superficiais», engadiu.
Considerou, neste punto, que «non ten sentido que os gobernos que recoñecen a perigosidade destas substancias, incluso se fan controis sobre a súa presenza nas augas e concas hidrográficas, utilicen herbicidas de forma indiscriminada para evitar o medre do monte nas beiravías das estradas».
Ademais, segundo apuntou, existen alternativas aos herbicidas químicos para o necesario control da vexetación non desexada tanto en estradas como en vías férreas –métodos mecánicos ou térmicos– que, «ademais de ser máis respectuosos co medio natural e menos contaminantes, permiten xerar emprego».
Secundino Fernández, que na quenda da réplica expuxo un caso real de envelenamento de 30 ovellas que pastaron en zonas afectadas por herbicidas tóxicos, lamentou o voto en contra do PP a unha iniciativa que reclamaba á Xunta exercer as súas competencias en relación o uso dos produtos fitosanitarios.
En concreto, a través da súa proposición non de lei, o BNG propuxo emprazar desde o Parlamento á Xunta a prohibir o uso de herbicidas en base a glifosato e derivados para a limpeza das vías de comunicación de titularidade da Xunta.
A proposta do BNG instaba así mesmo á Xunta a inspeccionar e controlar o uso destas substancias tóxicas nas vías de comunicación doutras administracións, promovendo a eliminación destas prácticas contaminantes e perigosas para a saúde das galegas e os galegos.
A iniciativa reclamaba finalmente á Xunta a análise das augas da súa competencia para ver o nivel de contaminación existente por estes tóxicos e a publicación dos resultados.
