A deputada de Política Social da Deputación da Coruña, Mar García Vidal, visitou hoxe a Fundación Foltra, en Teo, para facer entrega dun novo vehículo adaptado adquirido co apoio da institución provincial a través das liñas de axudas para a mellora dos servizos de transporte de entidades sociais da provincia.
O vehículo permitirá reforzar a atención sociosanitaria e de rehabilitación que a Fundación Foltra presta ás persoas con discapacidade e ás persoas dependentes que acoden ao seu centro de día, facilitando o seu desprazamento diario desde os seus domicilios ata as instalacións da entidade.
Mar García Vidal destacou que «este tipo de apoios teñen un impacto directo na vida de moitas persoas e das súas familias, porque garanten algo tan básico como poder chegar cada día ao centro, acceder ás terapias, manter rutinas e recibir a atención profesional que precisan».
A deputada subliñou tamén o compromiso da Deputación da Coruña co tecido social da provincia e coas entidades que traballan a pé de territorio. «A Fundación Foltra é un exemplo de servizo próximo, especializado e imprescindible para moitas familias desta comarca», afirmou.
O novo vehículo adaptado dará resposta a unha necesidade recorrente das familias usuarias, especialmente no caso de persoas con mobilidade reducida, persoas en cadeira de rodas ou persoas con dependencia física e/ou psíquica. Trátase dun recurso de uso diario que permitirá mellorar a mobilidade, garantir o acceso aos servizos terapéuticos e favorecer a continuidade da atención.
A través deste transporte, a Fundación Foltra facilita o acceso das persoas usuarias aos seus servizos: fisioterapia, logopedia, terapia ocupacional, atención psicolóxica e social, actividade física adaptada, coidados de saúde e centro de día.
A Fundación Foltra desenvolve o seu traballo en Teo desde o ano 2010 e ampliou a actividade do seu centro de día en 2021. A entidade presta servizos de rehabilitación neurolóxica funcional, atención sociosanitaria e centro de día para persoas con discapacidade e persoas maiores dependentes, atendendo usuarios e usuarias de distintos concellos da contorna, entre eles Teo, Vedra, Boqueixón, Santiago de Compostela e Oroso.
