O presidente da Deputación da Coruña, Valentín González Formoso, recibiu hoxe no Salón de Plenos da institución provincial á embaixadora de Ucraína en España, Yulia Sokolovska, e á presidenta de AGA-Ucraína, María Pavlenko, que fixeron entrega á Deputación dun recoñecemento polo apoio humanitario prestado ao pobo ucraíno desde o inicio da guerra.
No acto participou tamén o delegado do Goberno en Galicia, Pedro Blanco Lobeiras, xunto a representantes da comunidade ucraína en Galicia, membros da Corporación provincial e entidades que colaboraron nas distintas iniciativas solidarias impulsadas ao longo destes máis de catro anos.
A embaixadora agradeceu o apoio sostido da Deputación da Coruña e da sociedade coruñesa ao pobo ucraíno, tanto nos primeiros momentos da invasión rusa como durante estes anos de guerra. Sokolovska destacou «a empatía e simpatía que os ucraínos sentimos en Galicia e en España» e puxo en valor a importancia da axuda humanitaria recibida desde a provincia da Coruña.
En particular, a representante diplomática ucraína agradeceu os equipos médicos de emerxencia enviados pola Deputación, que, segundo subliñou, «salvan vidas ucraínas», así como a colaboración institucional e social que permitiu canalizar axuda material, sanitaria e humanitaria cara ás persoas afectadas pola guerra.
Formoso agradeceu o recoñecemento «en nome de toda a provincia da Coruña» e afirmou que a distinción pertence tamén á comunidade ucraína en Galicia, a AGA-Ucraína, á Cruz Vermella, ás empresas galegas que colaboraron no envío de ambulancias, ao persoal técnico que acompañou ás persoas refuxiadas na residencia do IES Rosalía Mera «e a tanta xente anónima que, sen facer ruído, decidiu axudar».
O presidente provincial lembrou que, desde o inicio da invasión rusa en febreiro de 2022, a Deputación «tivo clara unha cousa: non podiamos mirar cara a outro lado». «Ucraína leva máis de catro anos defendendo a súa liberdade, a súa soberanía, a súa democracia e o dereito de calquera pobo a vivir en paz», afirmou.
Formoso salientou que «o noso apoio non vai cesar mentres siga a ameaza rusa, que non é unha ameaza só para Ucraína, senón para a nosa liberdade, para os principios e valores que dan sentido a Europa».
Colaboración da Deputación
Ao longo destes anos, a Deputación impulsou distintas medidas de apoio ao pobo ucraíno. Unha das primeiras foi a acollida temporal de persoas refuxiadas de guerra na residencia do IES Rosalía Mera, titularidade da institución provincial, que nos primeiros meses do conflito se converteu nun espazo de emerxencia para mulleres, nenos e familias que tiveron que fuxir do seu país.
Nese centro ofrecéronse aloxamento, manutención, atención sanitaria, apoio psicolóxico, axuda coa documentación, aprendizaxe do idioma e acompañamento nun momento especialmente difícil.
A institución provincial tamén colaborou co envío de ambulancias galegas a Ucraína, vehículos destinados a reforzar a atención sanitaria, o traslado de feridos e a protección da poboación civil.
Máis recentemente, en colaboración con AGA-Ucraína, a Deputación impulsou tamén a dotación de equipamento médico para o Hospital Rexional de Sangue de Odesa, unha actuación que, segundo destacou a embaixadora, está a contribuír directamente a salvar vidas en Ucraína.
Formoso agradeceu expresamente o traballo de AGA-Ucraína e da súa presidenta, María Pavlenko, pola súa capacidade para tender pontes entre Galicia e Ucraína e para transformar a solidariedade en axuda concreta.
O presidente provincial advertiu tamén do risco de que a prolongación da guerra faga diminuír a atención pública sobre Ucraína e trasladou unha mensaxe de apoio en nome da provincia da Coruña: «Ucraína sabe que pode contar co apoio da Deputación da Coruña e con Galicia», afirmou.
