A concelleira de Urbanismo, Blanca García, informou de que, con motivo do avance das obras do proxecto Abrir Ferrol ao mar na contorna da praza de Galicia, será necesario introducir unha serie de modificacións na circulación rodada nesta zona. Para executar estes cambios, este mércores, día 8 de xullo, procederase ao pintado e sinalización viaria, o que permitirá poñer en marcha a nova ordenación do tráfico nos próximos días.
A principal modificación consistirá no peche ao tráfico do carril de baixada situado diante do teatro Jofre. A partir dese momento, os vehículos que circulen pola rúa da Igrexa poderán continuar recto ou descender cara á praza de Galicia utilizando o vial situado diante do edificio de Correos.
O novo percorrido quedará debidamente sinalizado mediante unha liña continua amarela. Ademais, á altura da fonte habilitarase un sinal horizontal de ceda o paso e unha liña de detención provisional, tamén de cor amarela, para ordenar a incorporación dos vehículos e reforzar a seguridade da circulación.
No que respecta ao transporte público, a parada de autobús manterase no seu emprazamento actual. Pola súa banda, a parada de taxis trasladarase de maneira provisional ao espazo situado inmediatamente detrás da parada do autobús, cunha capacidade para dous vehículos.
Pola súa banda, na intersección da rúa da Igrexa con Concepción Arenal habilitaranse dúas prazas reservadas para persoas con mobilidade reducida, e a zona provisional de carga e descarga situarase detrás do teatro Jofre.
Estes cambios teñen como obxectivo compatibilizar o desenvolvemento das obras coa mobilidade na zona, minimizando as afeccións ao tráfico e garantindo a seguridade tanto dos vehículos como dos peóns.
As obras da Abrir de Ferrol ao mar da fase Ferrol Vello, Magdalena e Arsenal foron adxudicadas á empresa S.A. de Obras y Servicios Copasa por un importe 5.332.228 euros (IVE incluído). Abrir Ferrol ao mar é un proxecto cofinanciado pola Unión Europea.
