A Xunta de Goberno adxudicou ademais o servizo de ambulancias para o Nadal entre 2026 e 2029, cun investimento próximo aos 167.600 euros.
Abel Caballero cualificou de “histórica” a actuación ofrecida por Chayanne ante un auditorio de Castrelos completamente ateigado. “Foi o concerto con maior afluencia da historia de Castrelos. Chayanne pulverizouno todo”, afirmou.
O alcalde destacou a entrega das miles de persoas que asistiron á actuación e o agradecemento expresado polo artista durante o concerto. “O público estivo totalmente entregado e xa temos un novo récord de afluencia nos concertos de Castrelos”.
Reservas Iván Ferreiro
O Concello porá á venda o vindeiro mércores 5.000 reservas para o concerto que Iván Ferreiro ofrecerá en Castrelos o sábado 15 de agosto, ás 22:00 horas. O prezo será de 10 euros. “Iván Ferreiro vai facer un concertazo. Vén cunhas ganas enormes e apetécelle moito actuar en Castrelos”, avanzou Caballero.
A venda desenvolverase mediante o sistema habitual, con dúas quendas de 2.500 reservas. Pola mañá, de 9:00 a 14:00 horas, ofreceranse 2.000 nos portelos de Castrelos e 500 a través da web municipal. Pola tarde, de 16:00 a 21:00 horas, distribuiranse outras 2.000 presencialmente e 500 en liña. Cada persoa poderá adquirir un máximo de catro reservas, que serán nominativas e intransferibles. Será necesario facilitar unha copia do DNI das persoas que accederán á platea e non se poderá modificar posteriormente a identidade das titulares.
Nadal
A Xunta de Goberno Local adxudicou o contrato do servizo de ambulancias para o Nadal de Vigo entre os anos 2026 e 2029, cun importe global próximo aos 167.600 euros.
O contrato forma parte dos preparativos da campaña 2026-2027, cuxa montaxe xa está en marcha. A iluminación contará con máis de 12 millóns de luces LED, preto de 500 rúas e prazas iluminadas e arredor de 7.000 elementos ornamentais, entre arcos, motivos decorativos e árbores. “Estamos xa facendo a montaxe do Nadal e tamén os contratos necesarios para cada unha das necesidades”, explicou o alcalde.
