O presidente da Deputación de Pontevedra, Luis López, afirma que o novo centro de talasoterapia do Terrón converterá a Vilanova de Arousa nunha “referencia” tanto a nivel provincial como autonómico. O mandatario provincial, acompañado polo alcalde Gonzalo Durán e o concelleiro e deputado, Javier Tourís, comprobou o inicio das obras dun proxecto valorado en 1,8M€ e financiado pola Deputación a través da primeira convocatoria do Plan Extra cunha achega de 900.000 euros.
“Proxectos como este contribúen desde o punto de vista deportivo, turístico e medioambiental, porque aquí se localizaba o antigo vertedoiro. Rexenerar esta zona con proxectos deste calado é motivo de satisfacción”, recalcou López sobre unha obra que supón un paso adiante para a provincia do deporte, para un turismo sustentable e para a mellora da calidade de vida da veciñanza.
O proxecto deseña un espazo que agrupa, nunha zona de equipamentos deportivos, a creación dun centro de talasoterapia e unha instalación deportiva anexa. A obra contempla a execución dunha edificación de tres plantas, que estará dotada cun vaso de recreo e con outro de chapoteo, así como unha sala multiusos, unha zona de vestiarios e unha zona de recepción. Trátase dunha iniciativa estratéxicae un proxecto complexo, para o que o Concello arousano contará coa colaboración da Deputación e a Xunta de Galicia. “Isto vai de buscar alianzas e niso o alcalde de Vilanova é capaz de conseguir os fondos necesarios para executar proxectos transformadores que están a situar a Vilanova como un espello no que mirarse”, subliñou o presidente, quen lembrou tamén o compromiso da Deputación para facilitar a cooperación entre administracións. “Hai decisións da Deputación que conlevan achegas económicas, pero tamén hai outras que non supoñen ningunha pero son determinantes para os concellos. Cando chegamos á Deputación hai tres anos, no primeiro pleno que tivemos adoptamos unha decisión da que se beneficiaron os 59 concellos de menos de 50.000 habitantes da provincia: a posibilidade de cofinanciar proxectos. Antes a Deputación non permitía o cofinanciamento con outras administracións como a Xunta, se penalizaba e tiñan que devolver o diñeiro por facer os deberes”, expuxo López.
A colaboración da Deputación co Concello de Vilanova de Arousa non se limita unicamente ao Plan Extra. Ao longo do mandato o Concello ten recibido de mans da Deputación, só a través dos distintos programas de cooperación, un total de 5,4M€ para executar proxectos diversos como a renovación do céspede artificial en distintos campos de fútbol municipais. Unha cifra á que hai que engadir investimentos en estradas coma a de Baión. “Unha das primeiras decisións que tomamos foi quitar do caixón a mellora desta estrada, que se está executando agora”, lembrou o presidente.
Neste sentido, o alcalde de Vilanova de Arousa, Gonzalo Durán recoñeceu tamén “a colaboración e a aposta” da Deputación polo proxecto. Unha xornada na que comezan as obras que o concelleiro e deputado Javier Tourís definiu como “un día grande para Vilanova” porque a “a xestión de tres administracións conflúen nun proxecto importante que vai mellorar a calidade de vida da veciñanza”. Pola súa banda, o presidente provincial referiuse á orixe dun “proxecto do que alcalde xa viña falando hai tempo, que logo plasmou nun papel e que agora vai ser unha realidade”, recoñeceu antes de poñer en valor o labor do rexedor e tamén do deputado para impulsar o movemento veciñal e a captación de fondos europeos a nivel provincial.
