O presidente da Deputación de Pontevedra, Luis López, deu conta este venres do visto bo a novos recursos ao abeiro do III Plan Extraordinario de Infraestruturas Deportivas para o Concello da Estrada, que recibirá máis de 200.000 euros para a remodelación do Novo Municipal. Ademais destes recursos para A Estrada, a Xunta de Goberno do organismo provincial tamén aprobou esta semana outros 1,15 millóns de euros para que A Caniza, A Guarda, As Neves, Cambados Covelo, Marín, Ponte Caldelas, Portas e Soutomaior impulsen e melloren dotacións deportivas baixo o paraugas deste plan provincial.
“Dez concellos máis e dez novos exemplos de como o Plan Extraordinario de Infraestruturas Deportivas, que reparte 8 millóns entre os concellos de menos de 50.000 habitantes, nos axuda a seguir construíndo a provincia do deporte na que queremos que se converta Pontevedra”, asegurou o presidente da Deputación.
Coa axuda aprobada, que A Estrada completará con 186.000 euros do Plan +Provincia 2026-2027, o Concello realizará melloras no campo de fútbol do Novo Municipal co subministro e instalación dun novo sistema de céspede artificial de última xeral para a práctica do fútbol e a substitución das luminarias existentes por 24 novos proxectores led, un total de seis por torre.
