A parroquia teense de Calo xa se prepara para celebrar o vindeiro 27 de decembro, ás 16:30 horas, a II San Silvestre Solidaria Sociedade Recreativa Calo, unha carreira festiva e familiar que combina deporte, Nadal e solidariedade. A cita, que partirá do campo de fútbol de Rebordelo, propón un percorrido de 4 quilómetros apto para todas as idades: nenos, maiores, mascotas e mesmo carriños de bebé. A organización anima tamén a participar disfrazado, mantendo así o espírito lúdico propio destas datas.
As inscricións poden realizarse en www.emesports.es por un prezo de 6 euros, dos que 4 euros serán destinados ao MAM Project, iniciativa solidaria que permitirá organizar un campus de fútbol inclusivo en Ukunda (Kenia) entre o 24 de febreiro e o 5 de marzo de 2026. Monitores do S.R. Calo viaxarán ata alí para ofrecer actividades deportivas e de acompañamento a nenos e nenas con parálise cerebral, así como ás súas familias. “A idea é levar fútbol, coidado e alegría a quen máis o precisa”, destaca a organización.
A carreira contará con premios ao primeiro clasificado, ao mellor disfrace —tanto individual como de grupo—, á mellor familia caracterizada e ao grupo máis numeroso. A iniciativa, que conta coa colaboración de diversas entidades e empresas locais, reafirma o compromiso da comunidade de Calo coa inclusión e a solidariedade.
Desde a organización destacan que cada dorsal supón “un gran paso para construír inclusión, apoio e esperanza”, convertendo esta San Silvestre nun evento que vai moito máis alá do deporte.
