A Asociación para a Defensa Ecolóxica de Galiza (ADEGA) inaugurou hoxe en Vilagarcía de Arousa a súa exposición ao aire libre «50 anos coidando a terra», que permanecerá instalada no Parque da Xunqueira ata o vindeiro 7 de xullo.
A mostra itinerante, creada con motivo do 50 aniversario da asociación ecoloxista máis lonxeva e senlleira do país, repasa a través de textos, fotografías e documentos históricos algunhas das principais mobilizacións e loitas ambientais que tiveron lugar en Galiza durante as últimas cinco décadas. Tras percorrer a maior parte das principais vilas e cidades galegas, a exposición fai parada agora en Vilagarcía, unha comarca con ampla e marcada traxectoria na defensa ambiental do río Umia e Ulla e da ría de Arousa.
Un acto de homenaxe á defensa ambiental no Salnés
O acto de inauguración estivo conducido polo secretario técnico de ADEGA, Fins Eirexas, quen agradeceu a presenza de representantes institucionais, colectivos sociais e entidades ecoloxistas da comarca. Entre as persoas asistentes atopábanse representantes da Plataforma en Defensa da Ría de Arousa (PDRA), da Coordinadora Encoro Río Umia, da CIG de Vilagarcía, así como membros da corporación municipal, entre eles, a tenente de alcalde, Tania García, o concelleiro de Turismo e Xuventude, Álvaro Carou. Tamén acudiu a concelleira do BNG, Rosa Abuín.
Durante a súa intervención, Eirexas fixo referencia ás actuais ameazas sobre a comarca, en relación co proxecto de celulosa de Altri e a reapertura da mina de Touro-O Pino, así como ás ameazas e intervencións históricas sobre os ríos Ulla e Umia e a ría de Arousa.
Na mesma liña, o presidente da Plataforma en Defensa da Ría de Arousa, Xaquín Rubido, «Xocas», aproveitou a súa intervención para advertir de que o contexto actual e o futuro están marcados por «unha grande incerteza» e por «unha ameaza clarísima de cambio climático», definida principalmente pola escaseza de auga e a suba das temperaturas. Rubido sinalou directamente o Goberno da Xunta do PP por «pretender expoliar o país e poñer en venda os seus recursos». Ante esta situación, apelou á creación de alianzas e dunha rede organizada no territorio que sexa capaz de «resistir este embate»: «Galiza debe situar no centro da súa acción a protección das augas continentais e mariñas e dos seus sectores produtivos, fundamentais para protexer o medio ambiente e garantir unha soberanía alimentaria que está en risco».
Pola súa banda, Paloma Fernández, en representación da Coordinadora Encoro Río Umia, destacou o papel destacado de ADEGA na loita na defensa do Umia, á cal agradeceu o seu compromiso, e lembrou a importancia da mobilización social e das alianzas entre colectivos. Tamén lembrou que aínda que a Xustiza obriga a través de sentenza a demoler o encoro, non houbo quen se atrevera a executala nos últimos 20 anos.
A tenente de alcalde, Tania García, tamén tomou a palabra para agradecer a ADEGA que teña recalado a súa exposición en Vilagarcía e reivindicou a necesidade da existencia de movementos sociais organizados na defensa da terra. Lembrou loitas na defensa da ría de Arousa como a relativa aos depósitos de Ferrazo ou contra a macrocelulosa de Altri. Finalmente, animou a trasladar os principios da defensa da vida e da ecoloxía aos centros de ensino.
Ao remate do acto institucional, a secretaria executiva de ADEGA, Belén Rodríguez, ofreceu unha visita guiada á exposición para todas as persoas asistentes, na que explicou os contidos da mostra e contextualizou os principais fitos da historia do ecoloxismo galego representados nos distintos paneis.
50 anos coidando a terra
A exposición ao aire libre estrutúrase en 16 paneis distribuídos en catro tótems cúbicos, acompañados de bidóns simbólicos que recrean materiais radioactivos, en referencia á oposición galega aos vertidos nucleares na Fosa Atlántica, unha das mobilizacións ecoloxistas máis emblemáticas do país.
A través de textos e imaxes, a mostra ofrece un percorrido pola historia da organización e polas principais ameazas ambientais ás que se enfrontou Galiza nos últimos 50 anos, desde a loita contra as verteduras contaminantes e os incendios forestais ata a defensa do territorio fronte á especulación e os macroproxectos industriais.
Esta mostra ten como obxectivo conmemorar o 50 aniversario de ADEGA, promover a educación ambiental e incentivar o compromiso das novas xeracións coa defensa da terra e dun futuro sustentable para Galiza.
