O centro urbano de Ares encherase de cor na próxima fin de semana para celebrar un ano máis as Alfombras Florais, a Festa de Interese Turístico de Galicia que converte á vila nun exemplo de compromiso colectivo e espíritu solidario, ao facer realidade unha tradición con máis de 40 anos de vida.
Será na noite do 6 de xuño cando a veciñanza confeccionará os tapices dos 5 tramos que se espallarán polo núcleo urbano, abranguendo unha distancia aproximada de 875 metros entre a rúa Real, a rúa María e a Praza da Igrexa.
Claveis, hortensias, verde, pampillo ou mesmo sal tinguida, serrín, cunchas ou arroz comporán os tapices dos cinco tramos, facendo que Ares amaneza cuberta de flores e de cor, mais sabendo tamén que todo o traballo principia moito antes, nas tarefas de picado e preparación dos materiais que coordina a Asociación das Alfombras Florais de Ares, ás que se lles agradece a súa involucración, ao permitir que continúe este exemplo de arte floral e que exemplifica un claro compromiso colectivo.
MERCHANDISING OFICIAL
Ademais, a propia asociación vén de lanzar novos produtos conmemorativos das Alfombras Florais de Ares, coa colaboración do Concello, a Xunta de Galicia, a Deputación e ABANCA; tres detalles que se poden adquirir contactando coa entidade veciñal para contribuír a cubrir os gastos de materiais necesarios na elaboración dos tapices.
-
Delantal verde – 6 euros
-
Costureiro de bolso con espello – 3 euros
-
Rotulador multicolor – 2 euros
