CCOO denuncia que Correos reduciu arredor dun 40 % a contratación de verán na Área Noroeste: Galicia, Asturias e Castilla y León, respecto á campaña estival do pasado ano, un recorte que o sindicato considera o maior rexistrado ata a data e que atribúe a un modelo de xestión baseado no axuste permanente do emprego.
Para CCOO, esta decisión non responde a unha circunstancia puntual nin a necesidades organizativas conxunturais, senón que fai parte dunha estratexia continuada de redución de custos presentada baixo conceptos como «eficiencia» ou «produtividade», pero que, na práctica, tradúcese en menos contratación, maior presión sobre o cadro de persoal e unha deterioración progresiva do Servizo Postal Público.
O sindicato considera especialmente contraditorio que estes recortes se produzan mentres a Dirección de Correos insiste publicamente en presentar a empresa como un actor estratéxico para a cohesión territorial e social, e anuncia o desenvolvemento de novos servizos públicos. «Non é posible fortalecer unha empresa pública debilitando a quen a fai posible cada día», sinala CCOO.
A denuncia de CCOO coincide, ademais, coa publicación do Informe Anual 2025 de Correos, no que a empresa presenta 11,5 millóns de euros de beneficio. Para o sindicato, ese resultado non pode analizarse sen ter en conta que unha parte relevante procede da venda de patrimonio inmobiliario e dunha política continuada de contención do emprego e redución de custos laborais. «Non é razoable presentar estes resultados como un éxito empresarial mentres o persoal segue a perder efectivos e a aumentar a súa carga de traballo», apunta CCOO.
Segundo o sindicato, a política laboral da empresa continúa marcada por unha elevada temporalidade (25 %), miles de persoas con relacións laborais en fraude de lei pendentes de estabilización, altos niveis de parcialidade (15 %), unha importante provisionalidade fraudulenta nos nomeamentos e unha oferta pública de emprego conxelada desde hai catro anos. CCOO advirte, ademais, de que este verán coincide unha circunstancia inédita: nunca as persoas que permanecen traballando durante o período estival tiveron que facelo con tan pouca contratación de apoio e nunca as que esperaban acceder a un contrato de verán encontraron tan poucas oportunidades de emprego.
Esta situación, engade o sindicato, repercute directamente sobre a calidade do servizo que recibe a cidadanía e agrava a sobrecarga de traballo dos traballadores e traballadoras, o que incrementa os riscos psicosociais e o desgaste físico e emocional. Neste sentido, CCOO lembra que Correos rexistra actualmente os niveis de absentismo máis elevados da súa historia recente, unha realidade que, ao seu xuízo, non se pode desvincular da deterioración continuada das condicións de traballo.
Así mesmo, o sindicato considera incompatible que a Dirección siga apelando ao esforzo e ao sacrificio das persoas traballadoras mentres mantén unha salvaxe política de redución da contratación e de contención do emprego. «O persoal leva anos sostendo a transformación de Correos con menos persoas traballadoras, maior carga de traballo e peores condicións laborais. Agora é a empresa a que debe cumprir cos seus compromisos», afirma CCOO.
Por todo isto, este sindicato esixe recuperar os niveis de contratación necesarios para garantir un servizo público de calidade, cubrir todas as vacacións, permisos e ausencias, reforzar o cadro de persoal e abrir unha verdadeira axenda laboral que permita reducir a precariedade e mellorar as condicións de traballo. «Sen emprego de calidade non pode existir un servizo público de calidade», conclúe CCOO.
