A vila de Cedeira viaxará do 26 ao 28 de xuño aos tempos nos que
fervía de actividade o castro de Sarridal. Desenvolverase a segunda edición da Feira Castrexa, de
novo co mercado de artesáns no Paseo da Mariña e coa Eira dos Nenxs e o campamento na praza
Roxa, espazo adicado á recreación dunha palloza castrexa, cunha exposición de ferramentas e
vestiario, exhibicións e moitos xogos e obradoiros para a xente miúda. O pregón inaugural da feira
pronunciarase na tarde do venres, ás 18.00h na praza da Marieta, e as actividades sucederanse en
horario de mañá e de tarde ata o domingo.
Ao longo dos tres días haberá diferentes pasarrúas con música, espectáculos teatrais ou de
malabares, que contribuirán a animar a rúa. No Paseo da Mariña instalaranse decenas de postos
de venda de artesanía e diversas viandas, que abrirán de 18.00 a 23.30h o venres e de 11.00 a 15.00
e de 17.00 a 23.30h o sábado e o domingo.
A Eira dos Nenxs ofrecerá máis de 18 xogos tradicionais de madeira, así como un rincón do teatro
con diferentes materiais castrexos para que os nenos e as nenas boten a voar a imaxinación con
escudos, cascos, espadas… Tamén na zona da praza Roxa recrearase un campamento castrexo,
no que haberá unha palloza, ferramentas e vestiario, así como moitas das actividades cotiás da
época, como unha forxa, ou a elaboración de pezas cerámicas, etc. De cando en vez, os
moradores desta aldea protagonizarán algunha batalla con espadas, ou estarán a tecer unha
prenda de roupa, entre outros quefaceres.
