Ao fío das dúas e media deste mediodía, o persoal do Servizo de Urxencias Sanitarias de Galicia-061 daba conta ao 112 Galicia dun accidente na N-550, quilómetro 93, en Carracedo, na localidade pontevedresa de Caldas de Reis.
Con estes datos, os xestores do 112 informaron dos feitos aos axentes de Tráfico e da Policía Local. Igualmente, pasaron aviso aos Bombeiros de Vilagarcía, aos efectivos de Protección Civil e ao persoal de mantemento da vía.
Con todo, unha vez no punto, os efectivos de Protección Civil comunicaron ao 112 Galicia que se tratou dun accidente con catro vehículos implicados. Ademais, segundo informaron, dúas persoas foron trasladadas ao Hospital Domínguez de Pontevedra polo persoal sanitario.
Condutor atrapado en Ponteareas
O 112 Galicia tamén tivo constancia esta tarde doutro accidente en Ponteareas cun coche envorcado.
Neste caso, foi o mesmo implicado quen informou ao 112 Galicia dez minutos despois das 17:00 horas. Indicaba que lle envorcara o coche preto da Igrexa de Cristiñade, no lugar de O Outeiro, parroquia de Cristiñade, en Ponteareas. Aseguraba que non estaba ferido pero non podía saír do interior do turismo, que quedara no medio da estrada.
Decontado, desde o 112 Galicia informouse aos GES-Bombeiros de Ponteareas e á Garda Civil de Tráfico. Tamén se pasou aviso á Policía Local, aos efectivos da Agrupación de Voluntarios de Protección Civil e aos Bombeiros de Vigo.
Finalmente, os membros do GES-Bombeiros sacaron á persoa polo maleteiro do vehículo e foi preciso que se achegase ata o punto o persoal do Servizo de Urxencias Sanitarias de Galicia-061 para atender á persoa, que non parecía revestir gravidade.
