O presidente da Federación Galega de Municipios e Provincias (FEGAMP), Alberto Varela, participou hoxe na sede da Xunta de Galicia no acto da sinatura do acordo de mellora do financiamento do Servizo de Axuda no Fogar (SAF) xunto co presidente da Xunta de Galicia, Alfonso Rueda. Ao acto tamén asistiron a conselleira de Política Social, Fabiola García, e o vicepresidente primeiro da FEGAMP e alcalde de Poio, Ángel Moldes.
Esta sinatura ven precedida dun longo proceso de negociación entre a Consellería de Política Social e a FEGAMP, despois de que dende a entidade municipalista se reclamase a mellora do financiamento do SAF tanto a Xunta de Galicia como ao Goberno de España para poder cubrir os prezos do SAF, segundo o previsto na Lei de Dependencia. Nesta reclamación tamén se denunciaban as dificultades dos concellos para asumir os custos do SAF non cubertos polos 12 euros/hora de servizo achegados pola Xunta e o Ministerio de Política Social ata agora.
En decembro pasado acadouse un acordo, referendado pola Comisión Executiva da FEGAMP, sobre a última proposta achegada pola Consellería de Política pola que se sube a 16 euros/hora de servizo en 2026, 17 euros/hora en 2027 e 18 euros/hora en 2028. Tamén incorporaba a creación dunha comisión de avaliación dos novos prezos nas futuras licitacións do SAF, para posible unha revisión das achegas.
Este acordo ten como premisas para a FEGAMP seguir a reclamar que dende a Xunta e o Goberno cubran o custo do SAF en cumprimento da Lei de Dependencia, como tamén se recolle no texto do acordo. E ao mesmo tempo, tamén atende e palía a urxencia económica que están a padecer os concellos polos recursos que teñen que adicar ao SAF.
Despois da sinatura do acordo e en declaracións aos medios presentes, o presidente da FEGAMP puxo en valor o proceso de negociación mantido, a pesares das dificultades e do moitísimo tempo que se ven reclamando á mellora do financiamento.
O acordo acadado “era necesario” e suporá “un alivio para as arcas dos concellos”, especialmente para os pequenos, que padecen “unha situación de emerxencia” ao ter que destinar boa parte dos seus recursos para atender o SAF, sinalou Alberto Varela, aínda que lembrou que “non é o mellor acordo que se perseguía dende a FEGAMP”, xa que se segue a reclamar que a totalidade do custo do SAF se sufrague coas aportacións da Xunta e do Estado.
“A política ten que chegar a acordos” nos que ambas partes cedan, salientaba Varela, que rematou confirmando que a FEGAMP seguirá a traballar para conseguir que a totalidade do custo do SAF se sufrague coas aportacións da Xunta e do Estado.
