O pleno da corporación aprobou esta tarde por unanimidade a declaración institucional para denominar o centro de saúde de Serantes co nome do Doutor José Pedrouzo Bardelas.
Na declaración destácase o traballo facultativo que durante décadas José Pedrouzo desenvolveu na cidade “cunha entrega exemplar, converténdose nun referente da sanidade pública e nunha persoa fondamente querida polos seus pacientes, compañeiros e pola cidadanía ferrolá”.
No ano 2015 tomou posesión como concelleiro do Concello de Ferrol, “exercendo esta responsabilidade coa mesma ética, honestidade e vocación de servizo que caracterizaron toda a súa vida profesional”.
A declaración recolle tamén que “foi un home comprometido coa súa cidade e unha persoa que soubo gañar o respecto, o cariño e a gratitude dos ferroláns e ferrolás”.
Por todos estes motivos, e recollendo a petición presentada o 8 de outubro de 2025 da AVV de Serantes, o Concello de Ferrol e a entidade veciñal consideran que a denominación do centro de saúde de Serantes co nome de Doutor José Pedrouzo Bardelas constitúe unha merecida homenaxe á súa figura e un acto de xustiza e gratitude colectiva cara a quen dedicou a súa vida ao coidado das persoas, á defensa da saúde pública e ao servizo da cidadanía.
O Concello de Ferrol dará agora traslado á consellería de Sanidade da aprobación desta declaración institucional.
DECLARACIÓN INSTITUCIONAL ASPANEPS
O pleno da corporación tamén mostrou o seu apoio unánime ás demandas de Aspaneps. A Asociación de Pais e Nais de Nenos e Nenas con Problemas Psicosociais leva 46 anos realizando un importante traballo preventivo-asistencial coa infancia, a familia e a discapacidade na área de Ferrolterra. Na actualidade, presta o seu servizo nun inmoble situado no barrio de Canido, propiedade antes do Invifas, agora Invied pertencente ao Ministerio de Defensa, en virtude dunha autorización de uso que establecía unha renda simbólica e asumible para unha entidade destas características ata o ano 2026. A partir do vindeiro mes de xuño, está previsto que esta autorización finalice, pasando a renda mensual de 12 euros a 1.086 euros, un incremento que resulta absolutamente desproporcionado e totalmente inasumible para unha entidade sen ánimo de lucro como Aspaneps, poñendo en risco a continuidade dun servizo esencial que non ten alternativa inmediata e que atende a centos de familias da comarca.
Por este motivo, o Concello solicitará ao Invied e ao Ministerio de Defensa que revise a situación actual, dacordo coa moción do 25 de xaneiro de 2024, e manteña unha renda acorde á natureza social e sen ánimo de lucro da entidade, garantindo así a continuidade dun servizo fundamental para máis de 1.000 nenos e nenas e as súas familias de Ferrol e da súa comarca.
OUTROS TEMAS
A concelleira de Facenda, Susana Sanjurjo, deu conta do informe trimestral de execución do orzamento do primeiro trimestre do 2026, “a porcentaxe de execución é do 12% nos Ingresos e do 13% nos Gastos, respecto aos créditos iniciais do orzamento de 97 millóns de euros”. A edila recordou que “este Goberno fixo xa catro orzamentos, e remataremos o mandato co quinto”.
Así mesmo, informouse de que o Concello de Ferrol cumpre o Período Medio de Pago tanto en termos legais como en termos económicos, sendo ambos de 39,18 días e de 26,19 días, respectivamente. “Neste trimestre o Concello pagou unhas 1.000 facturas, cun importe total de casi 7 millóns de euros”, revelou a edila, así mesmo case o 95% de todas as facturas conseguíronse pagar en prazo.
Así mesmo, o pleno aprobou por unanimidade a concesión dunha felicitación pública e individual a varios axentes da Policía Local por accións meritorias que realizaron no 2025.
