A concelleira de Urbanismo, Blanca García, informou hoxe do inicio das obras da Cidade Náutica de A Cabana, unha actuación integrada no proxecto da Cidade do Deporte que suporá un investimento de 1.698.669,39 euros e contará cun prazo de execución de 14 meses.
O proxecto ten como obxectivo recuperar e poñer en valor o patrimonio histórico industrial desta contorna, ao tempo que transformará a zona nun novo espazo público de encontro, lecer e paseo para a cidadanía.
A intervención permitirá crear un percorrido peonil integrado no paseo marítimo, reforzando a conexión cos principais equipamentos deportivos do eixo formado por A Cabana, FIMO e A Malata. Deste xeito, avanzarase na configuración dun espazo continuo destinado á práctica deportiva, á mobilidade sostible e ao desfrute da ría.
DETALLES DA CIDADE NÁUTICA
A parcela de 13.000 metros cadrados alberga seis edificacións nas que se intervirán. No edificio 1, de preto de 900 metros cadrados, compartirán espazo os dous clubs de remo centralizando, así, os servizos principais, a administración e as zonas de adestramento, pero mantendo unha independencia nos seus usos e organización. O edificio organízase, de tal maneira, que o uso de cada un dos clubs é independente, dividíndose en cada unha das plantas. Centralízase, unicamente, a entrada e a área de administración, que se divide en tres despachos e unha sala de reunións.
Na edificación 2, con 573 metros cadrados, mantense o uso actual, exponse como pañol de embarcacións. A intervención limítase a dotar de novos espazos que complementen o seu uso na ampliación da edificación 1, cun taller de reparacións e espazo para almacenaxe de remos. Substitúese, tamén, a cuberta de lona.
Con respecto ás actuacións na edificación 3, con 574 metros cadrados construídos, limparase de todos os anexos posteriores, reducindo a edificación ao volume principal e orixinal. Interiormente baléirase completamente deixando un espazo aberto para almacén de embarcacións do Club de remo e o Club de vela. Na súa parte posterior, está a edificación 4 (225 metros cadrados), limparase deixando só os pórticos metálicos e a cuberta, e será un espazo de almacenaxe a maiores para os clubs.
A edificación 5 é o “tinglado” e ten 355 metros cadrados de superficie. Acondicionarase o espazo para catro vestiarios do club de vela, dous aseos e prevese a creación dun ambigú, que será un punto de referencia non só para os integrantes dos clubs, senón tamén un punto de encontro para os cidadáns.
E a edificación 6, con 140 metros cadrados, pertence na actualidade ao Grupo Bazán e ao Club Actividades Subacuáticas Ferrol. Os espazos deste edificio están destinados a uso administrativo con dous despachos e unha sala de uso polivalente.
Ademais, a ponte para o tren ao porto exterior inclúe unha pasarela peonil e ciclista, que permitirá facer da enseada de A Malata un roteiro circular coa que, ademais, abrirase á cidadanía a futura Cidade náutica de A Cabana. Así calquera persoa poderá ir dende A Graña a Caranza vendo o mar, son 10 quilómetros para pasear e facer deporte.
Dacordo co plan de mobilidade esta senda peonil e o carril bici, conectarán, no próximo ano, os barrios de A Graña, A Cabana, Serantes, Ferrol Vello, A Magdalena, Esteiro e Caranza. E no 2030, Ultramar, San Xoán, A Gándara, o Ensanche, Santa Mariña e Canido.
O proxecto da Cidade do Deporte conta cun convenio de colaboración coa consellería de Deportes da Xunta de Galicia e é susceptible de ser financiado polo Fondo Europeo de Desenvolvemento Rexional (Feder) dentro do Programa Plurirrexional de España 2021-2027.
