Galicia consolida a súa posición de liderado na loita contra o sobrepeso e a obesidade, destacando como o único sistema sanitario público nacional que conta cunha estratexia integral para facer fronte a estas patoloxías.
Así o apuntou a subdirectora xeral de Estilos de Vida Saudable da Consellería de Sanidade, Sagrario Pérez, na xornada O valor social dun mellor control da Obesidade en Galicia, onde especialistas en economía da saúde, profesionais sanitarios e pacientes abordaron o impacto económico e social destas enfermidades.
A comunidade galega dispón dun modelo propio baseado na planificación, na avaliación continua e na actuación coordinada entre os ámbitos sanitario, educativo, social e comunitario, un enfoque que permite anticiparse no diagnóstico e tomar medidas adaptadas ás necesidades reais da poboación.
Entre as ferramentas de vixilancia coas que conta o sistema sanitario público galego destaca o Plan de Obesidade Zero. Trátase dun programa que impulsa accións dirixidas a favorecer os estilos de vida saudables en todas as etapas da vida.
Segundo os datos expostos esta mañá, no ano 2025 máis de 421.000 galegos tiñan obesidade, unha cifra que ascenderá ate os 489.000 no horizonte do ano 2030. De acordo co informe presentado, se extrapola a prevalencia actual da obesidade ás proxeccións poboacionais previstas para o ano 2030, poderíase acadar un aforro de 1.400 millóns se a poboación galega con obesidade reducise un 5-10 % do seu peso.
Tal e como explicou a responsable sanitaria, o Plan galego para facer fronte ao sobrepeso centra os seu esforzos na detección precoz de situacións de risco, a definición dunha alimentación equilibrada e a práctica habitual de actividade física.
Nesta liña, tamén conta con accións específicas no referido á atención das contornas escolares, laborais e comunitarias, ou para grupos de poboación especialmente vulnerables.
Galicia, exemplo de anticipación e responsabilidade pública
A existencia dunha estratexia específica e transversal sitúa a Galicia nunha posición destacada dentro de España. A aposta pola prevención, o coñecemento e a coordinación institucional reforza o compromiso do sistema sanitario galego co benestar presente e futuro da cidadanía.
A Xunta continuará avanzando en políticas innovadoras que melloren a calidade de vida da súa poboación e que consoliden á comunidade galega como un referente na promoción da saúde.
