O Sindicato de Barrio e a Plataforma de Vivenda xunto con outras colectivas e veciñanza organizada convocan unha manifestación o vindeiro 6 de xuño na Coruña en defensa do dereito á vivenda, nun contexto marcado pola suba continuada dos prezos do alugueiro, a especulación inmobiliaria e a expulsión de veciñas e veciños dos seus barrios.
As organizacións fan un chamamento á participación veciñal e á organización colectiva para facer fronte á actual crise habitacional e reclamar medidas urxentes que garantan o acceso a unha vivenda digna. A mobilización pretende visibilizar o malestar social existente e esixir respostas reais por parte das administracións.
No marco da preparación da mobilización, estanse a celebrar reunións abertas todos os luns ás 19:00 horas no centro social A Revolteira (rúa Falperra 13, baixo), dirixidas a todas as persoas interesadas en participar na organización da manifestación.
