GALICIA DESIGN WEEK (GDW) inaugurou este martes o seu gran bloque expositivo na avenida do Porto, en plena zona da Mariña, para dar conta do valor e da potencia creativa do país. O acto de apertura oficial, celebrado ás 12.00 horas, contou coa presenza do concelleiro de Cultura e Turismo do Concello da Coruña, Gonzalo Castro, e do director da Axencia Galega das Industrias Culturais (Agadic) da Xunta de Galicia, Jacobo Sutil; mais tamén asistiron Alex Rico e Marta González (codirección da GDW), representantes de patrocinadores do evento (Grupo Malasa e Mobalco) e varias das autoras participantes: a escenógrafa Ana Inés Jabares Pita, a arquitecta Celsa Pesqueira, a fotógrafa creativa María Cereijo, o deseñador de moda Mario Leiro e a deseñadora Zeltia Iglesias.
O evento serviu para presentar as dúas propostas que a veciñanza poderá descubrir estas semanas durante a sétima edición da GDW. Por unha banda, Designed in Galicia, unha recompilación dos proxectos máis salientables que colleitaron galardóns de prestixio ao longo do último ano, como é o caso de Miguel Leiro (Premio Nacional de Diseño 2025), D-Due (Premio Luis Seoane de Deseño 2025), estudios de arquitectura (entre os que destacan Carlos Seoane, CREUSeCARRASCO ou Carbajo Barrios) ou axencia creativas (teiga.studio).
As estruturas que soportan as pezas desta mostra -que se poderá visitar até o 14 de xuño- foron deseñadas e fabricadas especificamente para esta cita por Grupo Malasa, a firma familiar galega que lidera a produción de mobiliario a medida en toda Europa.
Pola outra, o público poderase achegar até o 4 de xuño a #novodeseñogalego, unha escolma que pon o foco no talento emerxente. A exhibición recolle un total de 20 propostas asinadas por 10 perfís multidisciplinares e que estes días están a presentar os seus proxectos na cidade tanto nas sesións TALKS e MICROTALKS: Álvaro Bellón, Ana Inés Jabares Pita, Andrea Ures, Lamaelume, Laura Campos, María Cereijo, mariOLéiro, Nuclear, Pesqueira e Zeltia Iglesias.
Precisamente esta tarde Álvaro Bellón, Camila Sánchez, Mario Leiro, Celsa Pesqueira e Zeltia Iglesias participarán ás 19.00 horas nunha xornada de presentacións na libraría Restory para expor ante o público os seus traballos máis recentes, como parte da programación OFF do festival de deseño.
