Trátase dun galardón de carácter anual que entregamos para distinguir a persoa, institución ou colectivo que teña colaborado contribuíndo ao desenvolvemento da psicoloxía e ao avance dunha sociedade máis xusta e saudable.
Deste modo, a través de todo o simbolismo do noso premio máis estimado, queremos significar o traballo que vides realizando na defensa dunha sanidade pública universal, equitativa e de calidade. A vosa traxectoria, sostida no tempo e desenvolvida desde o compromiso coa cidadanía, constitúe un exemplo de mobilización social en defensa dun dereito fundamental como é o dereito á saúde.
Ao longo destes anos, a Asociación Galega para a Defensa da Sanidade Pública ten contribuído de maneira decisiva a visibilizar as dificultades e carencias do sistema sanitario público, promovendo o debate social e reclamando políticas públicas que garantan unha atención sanitaria digna para toda a poboación. A vosa capacidade para impulsar unha resposta colectiva e sostida fronte ás desigualdades no acceso á atención sanitaria converteuse nun referente para a defensa dos servizos públicos.
Nun contexto no que os sistemas sanitarios afrontan importantes retos estruturais, entre eles, o incremento das necesidades en saúde mental e benestar psicolóxico, resulta imprescindible contar con voces que reivindiquen o fortalecemento da sanidade pública como un dos piares fundamentais do estado do benestar. O voso labor contribuíu a lembrar que a saúde é un dereito colectivo que require compromiso institucional, recursos suficientes e unha planificación orientada ás necesidades reais da cidadanía.
É importante pois, que como colectivo profesional comprometido co benestar psicolóxico das persoas e das comunidades, recoñezamos o traballo de quen leva contribuído tanto á defensa dun sistema sanitario público forte e accesible. Compartimos o desexo de construír unha sociedade máis xusta e solidaria, na que os dereitos sociais, entre eles o dereito á saúde, sexan plenamente garantidos.
Coa concesión do noso querido Premio Dolores Llópiz – Psicoloxía e Sociedade 2026, desexamos recoñecer e impulsar o voso compromiso coa defensa da sanidade pública e co benestar da cidadanía. Será para nós unha verdadeira honra contar coa vosa presenza no acto de entrega do premio Dolores Llópiz – Psicoloxía e Sociedade, que se celebrará o vindeiro 22 de maio en Padrón, na sede da Fundación Rosalía de Castro, no marco do noso acto institucional «Achegas da Psicoloxía».
