O delegado do Goberno en Galicia, Pedro Blanco presidiu hoxe na Coruña o acto central de conmemoración do Día da Seguridade Privada, no que reivindicou a colaboración dos homes e mulleres que traballan neste sector para a consolidación de Galicia como segunda comunidade máis segura de España. O delegado compartiu con empresas e vixilantes, detectives privados, gardas rurais e pesqueiros e escoltas privadas a posición que vén de renovar a Comunidade Autónoma xunto cos Corpos e Forzas de Seguridade. A todos eles lembrou que este posto “ten a responsabilidade engadida de seguir traballando coa mesma eficacia e colaboración”.
O acto do Día da Seguridade Privada de Galicia, que se desenvolveu no Teatro Colón da Coruña, celebrouse en coincidencia coa celebración deste día a nivel nacional. Contou coa participación do xefe superior de Policía de Galicia, Pedro Pacheco, o xeneral xefe da 15 Zona da Garda Civil, Miguel Ángel González; o presidente da Asociación de Empresas de Seguridade de Galicia, Roberto Lage; a delegada territorial da Xunta na Coruña, Belén do Campo; a concelleira de Seguridade Cidadá da Coruña, Montserrat Paz.
Unha parte central desta conmemoración foi a entrega das mencións honoríficas a homes e mulleres do sector da Seguridade Privada de Galicia, e que son propostas pola Xefatura Superior de Policía e a Zona de Galicia da Garda Civil. Este ano foron máis de 90 homes e mulleres de distintos sectores os que foron homenaxeados, ben pola súa traxectoria de cooperación cos corpos policiais ben por unha actuación meritoria no último ano. Entre estas mencións, fíxose un recoñecemento ao vixilante da Coruña Luis Paz, quen actuou cando estaba fóra de servizo para protexer a unha persoa maior que estaba a sufrir un roubo con violencia.
Pedro Blanco significou que cada vez son máis a mulleres que acadan estas mencións, o que amosa “como a muller está a sumar espazos nun sector ata o da agora marcadamente masculino”. Nesta liña, o delegado fixo un chamamento a empresas “a que promovan a incorporación de máis perfís femininos ás súas plantillas, para acadar nelas a mesma representatividade que a muller ten no conxunto da poboación”.
A esta reflexión, Pedro Blanco, engadiu o agradecemento da cidadanía de Galicia e do Goberno ao conxunto da Seguridade Privada polo seu compromiso co mantemento da seguridade cidadá e na protección dos recursos forestais e pesqueiros da Comunidade.
Comentarios 1