O delegado do Goberno en Galicia, Pedro Blanco, animou aos máis de 23.281 mozas e mozos de Galicia nacidos no 2008 a solicitar o Bono Cultural Xove na súa quinta convocatoria, correspondente a 2026. Os nacidos e nacidas en 2008 teñen dereito a solicitar esta axuda de 400 euros, que poderán destinar á adquisición e desfrute de produtos, servizos, formación e actividades culturais.
Pedro Blanco salientou a dobre e positiva vertente desta medida do Goberno que impulsa as industrias culturais ao tempo que beneficia á mocidade. “Tanto os creadores e creadoras da nosa cultura, sexa de libros, de películas ou de artes escénicas, entre outras; como os e as libreiras, os cines, ou os teatros, vense beneficiados da medida”, destacou o delegado, que tamén sinalou os beneficios para a mocidade, “que accede á cultura da man do Goberno ao facilitarlles o desembolso económico que este lles pode supoñer”.
Para solicitalo, as persoas que cumpran 18 anos en 2026 deben rexistrarse e realizar a solicitude na web https://bonoculturajoven.gob.es/ ata o 31 de outubro. Será imprescindible que, previamente, os interesados obteñan unha destas tres formas de identificación dixital: Cl@ve con rexistro básico (que se pode solicitar e obter por videochamada), Cl@ve con rexistro avanzado (de forma presencial e para aqueles que non cumprisen aínda os 18 anos) ou ben o Certificado dixital. Os mozos e mozas interesados en solicitar o Bono Cultural Xove poden realizar o trámite en nome propio ou a través da representación dun adulto, para o que é preciso anexar o formulario de representación descargable na páxina web, correctamente asinado polo beneficiario. Nestes casos, o libro de familia non é un documento acreditativo da representación.
A esta axuda teñen dereito os mozos e mozas que cumpran 18 anos en 2026 que sexan de nacionalidade española, posúan residencia legal en España, sexan solicitantes de asilo, desprazados temporais ou estranxeiros ex tutelados. Segundo datos do Instituto Nacional de Estatística, trátase de 23.281 potenciais beneficiarios en Galicia, máis de 560.000 potenciais beneficiarios en todo o país. En 2022, primeiro ano de vixencia da iniciativa, obtiveron o Bono Cultural Xove un total de 277.607 persoas en España; en 2023, a cifra ascendeu a 319.237; en 2024 foron 334.435 e no 2025 superouse de novo o récord con 363.054 beneficiarios.
Sobre o Bono Cultural Xove
A partir da concesión da axuda, os mozos dispoñen dun ano para utilizar os 400 euros en produtos ou servizos culturais nos establecementos físicos adheridos, 4.781 en toda España, 390 deles en Galicia (case 70 máis que o ano pasado). O Bono Cultural Xove funciona cunha tarxeta prepago que o beneficiario pode ter de forma virtual no seu móbil ou recibir de forma física na casa. Con ela pode gozar de experiencias e produtos culturais, que se dividen en tres categorías para favorecer a diversificación do gasto, coa seguinte distribución:
- 100 euros para produtos físicos, por exemplo, libros, prensa ou discos.
- 100 euros para produtos dixitais, como subscricións a plataformas, prensa dixital, pódcast ou videoxogos en liña.
- 200 euros para artes escénicas: teatro, ópera, cinema, danza, museos…
- Como novidade desta convocatoria, ata un máximo de 400 euros destinados a cursos e talleres de tipo cultural en modalidade presencial e en liña; instrumentos musicais e medios de creación e artísticos.
O Bono Cultural Xove está regulado polo Real Decreto, con vixencia indefinida, que o Consello de Ministros aprobou o 21 de marzo de 2023, a proposta do ministro de Cultura. Conta cunha dotación de 170 M€ nos Orzamentos Xerais do Estado.
