Un viandante viu saír fume dunha xanela e avisou a través do 112 Galicia.
A súa chamada permitiu activar un operativo de resposta, que contou coa participación dos profesionais de Urxencias Sanitarias de Galicia-061, dos axentes da Policía Nacional e Local e dos Bombeiros da Coruña.
Nembargantes, os recursos empregados para a extinción foron escasos porque, dentro da vivenda, apenas quedaba lume e tampouco temperatura. Por iso, os efectivos do Parque Municipal de Bombeiros consideran que o incendio autoconsumiuse e puido orixinarse nunha butaca.
Desafortunadamente, na inspección do interior do domicilio, os bombeiros localizaron unha muller sen vida, aínda que descoñecen se as causas do falecemento gardan relación co incendio.
En calquera caso, será unha investigación posterior a que determine as circunstancias da morte.
