O alcalde de Ferrol, José Manuel Rey Varela, e o presidente de Special Olympics Galicia, Eladio Fernández, presentaron esta mañá no pazo municipal o 28º Maratón autonómico urbano Special Olympics Galicia, que reunirá a máis dun cento de deportistas na cidade departamental este sábado, 6 de xuño, a partir das 10:30 horas. No acto de presentación da cita tamén participaron a delegada territorial da Xunta en Ferrol, Martina Aneiros, o concelleiro de Deportes, Ricardo Aldrey, e o presidente da Asociación Nuestra Señora de Chamorro, Juan Manuel Victoria Meizoso.
Este evento deportivo, que Special Olympics celebra desde 1993, conta coa colaboración do Concello e da Asociación Nuestra Señora de Chamorro -que exerce como entidade anfitrioa- e está destinado a persoas sen e con discapacidade intelectual de toda Galicia, tanto nenos e nenas como mozos, mozas e persoas adultas, co obxectivo de promover a inclusión social a través do deporte.
O alcalde agradeceu á entidade a celebración desta cita autonómica en Ferrol, que se converterá no escenario galego da convivencia e a inclusión. “Gústanos que Ferrol sexa elixido para cousas importantes, como as noticias que destas últimas datas e como este evento deportivo de Special Olympics”, afirmou Rey Varela. A inclusión real e efectiva de todas as persoas na sociedade é un obxectivo común e , sen ben “hai obstáculos na vida, o bonito é ser capaces de convencernos de que todos, con apoio, somos capaces de chegar á meta”, manifestou o alcalde.
Neste sentido, fixo un chamamento aos ferroláns a apoiar aos deportistas participantes para que teñan “o respaldo de toda unha cidade e se sintan aquí como na súa casa”.
Pola súa banda, Eladio Fernández agradeceu a colaboración do Concello de Ferrol neste evento que fomenta que haxa unha “integración real” e lembrou que a entidade que preside promove a actividade física como unha ferramenta de superación coa que persoas con discapacidade intelectual poidan dar a coñecer e desenvolver as súas actividades.
Martina Aneiros destacou que o deporte é unha importante vía para “construír unha sociedade máis xusta” e, Juan Manuel Victoria Meizoso apuntou que “Ferrol é un referente en inclusión e deporte e este sábado non veremos carreiras: veremos superación e compañeirismo”.
COMPETICIÓN E PERCORRIDOS
Os participantes poderán competir ata en catro categorías diferentes adaptadas aos seus niveis e capacidades. Deste xeito, haberá un percorrido de 300 metros que sairá da rúa Real (preto da confluencia coa praza de España) e terá chegada na praza de Armas; un de 800 metros con saída de Real cara praza de España, María, Rubalcava e meta en praza de Armas; outro de 1.500 metros que sairá de Real, subirá por Lugo, seguirá por María, Terra e finalizará na praza de Armas; e o máis longo será de 3.000 metros, que consistirá en completar tres voltas con saída da rúa Real, praza de España, María, Terra e chegada en Real.
